ក្នុងសេចក្តីជូនដំណឹងនៅព្រឹកថ្ងៃទី៦ ខែមិថុនានេះ ក្រសួងធនធានទឹក និងឧតុនិយម បានបញ្ជាក់ថា កាលពីយប់មិញនេះ ប្រព័ន្ធសម្ពាធទាប ITCZ បានកើតឡើង ដោយអូសបន្លាយពីភាគខាងជើងប្រទេសថៃ ភ្ជាប់ជាមួយសម្ពាធទាបសកម្មមួយនៅលើសមុទ្រចិនខាងត្បូង។
ក្នុងនោះ ពីថ្ងៃទី៧-១១ ខែកក្កដា ប្រព័ន្ធសម្ពាធទាបនឹងរំកិលចុះមកក្រោមអូសបន្លាយកាត់លើតំបន់ជួរភ្នំដងរែកនិងភាគឦសានប្រទេសកម្ពុជា។
ស្ថានភាពបែបនេះ នឹងធ្វើឲ្យបណ្តាខេត្តនៅតំបន់វាលទំនាបកណ្តាលអាចមានភ្លៀងធ្លាក់ក្នុងកម្រិតពីបង្គួរទៅច្រើន លាយឡំ និងផ្គររន្ទះ ខ្យល់កន្រ្តាក់ ហើយទន្ទឹមនោះ ក៏មានផ្នែកមួយចំនួន នៃបណ្តាខេត្តនៅក្នុងភូមិសាស្រ្តជាប់ជួរភ្នំក្រវាញ និងជួរភ្នំដងរែក មានភ្លៀងធ្លាក់ខ្លាំង។
ដោយឡែកតំបន់មាត់សមុទ្រវិញ អាចនឹងមានភ្លៀងធ្លាក់ពីបង្គួរទៅខ្លាំង នៅលើផ្ទៃសមុទ្រនឹងអាចមានភ្លៀងខ្យល់ខ្លាំង និងរលកសមុទ្រខ្ពស់ៗ៕
