រដ្ឋលេខាធិការក្រសួងសុខាភិបាល និងជាប្រធានក្រុមការងារប្រតិបត្តិការបច្ចេកទេស និងផ្គត់ផ្គង់នៃគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ បានបញ្ជាក់ប្រាប់បណ្តាញព័ត៌មានក្នុងស្រុកថា វ៉ាក់សាំងកូវីដ-១៩ របស់ក្រុមហ៊ុនស៊ីណូវ៉ាក់ (Sinovac) ពីសាធារណរដ្ឋប្រជាមានិតចិន ចំនួន៥០ម៉ឺនដូស ក្នុងចំណោម ១លានដូស នឹងមកដល់ព្រះរាជាណាចក្រកម្ពុជា នៅថ្ងៃទី១១ ខែឧសភា ឆ្នាំ២០២១ស្អែកនេះ នាវេលាម៉ោង១០ និង១៥នាព្រឹក។
ជាការកត់សម្គាល់ការមកដល់នៃវ៉ាក់សាំងនេះ គឺស្របពេលដែលរាជរដ្ឋាភិបាលកម្ពុជា កំពុងបង្កើនការចាក់វ៉ាក់សាំងកូវីដ១៩ ដល់ប្រជាពលរដ្ឋដែលស្ថិតនៅតំបន់ប្រឈម ជាពិសេសនៅតំបន់ក្រហម ក្នុងរាជធានីភ្នំពេញ ឲ្យបានគ្រប់គ្នា។
យោងតាមរបាយការណ៍ពីក្រសួងការពារជាតិបានបង្ហាញថា ក្នុងរយៈពេល៩ថ្ងៃ នៃយុទ្ធនាការចាក់វ៉ាក់សាំងបង្ការជំងឺកូវីដ១៩ ជូនប្រជាពលរដ្ឋនៅតំបន់ក្រហម នៅរាជធានីភ្នំពេញ ពោលចាប់ពីថ្ងៃទី០១ ដល់ទី០៩ ខែឧសភា ឆ្នាំ២០២១ កម្លាំងកងទ័ពបានចាក់វ៉ាក់សាំង ជូនប្រជាពលរដ្ឋបានចំនួន ៣៩៩,៦១៧នាក់៕
