កាលពីថ្ងៃម្សិលមិញនេះ មានការរិះគន់នៅលើបណ្តាញសង្គមថា លោក វន សីផា អភិបាលស្រុកសាមគ្គីមានជ័យ នៃខេត្តកំពង់ឆ្នាំង បានដកកាំភ្លើងបាញ់សត្វគោរបស់អ្នកស្រុកមួយក្បាលងាប់ ក្រោយពីខឹងសត្វគោនោះចូលមកស៊ីស្មៅក្នុងបរិវេណសាលាស្រុក។
តាមប្រភពខ្លះថា នៅល្ងាចថ្ងៃទី៣០ ខែមេសា ឆ្នាំ២០២១ម្សិលមិញ មានសត្វគោមួយហ្វូងបានចូលទៅក្នុងបរិវេណសាលាស្រុកសាមគ្គីមានជ័យ ក្រោយមកគេក៏បានលឺសម្លេងកាំភ្លើងផ្ទុះចំនួន២គ្រាប់ ចេញពីបរិវេណសាលាស្រុក រួចសត្វគោបានផ្អើលបែកហ្វូង ដែលដំបូងពលរដ្ឋនៅក្បែរនោះស្មានថាជាករណីបែកកង់ឡាន ប៉ុន្តែក្រោយមកគេក៏ឃើញសត្វគោរបស់ពលរដ្ឋ១ក្បាលងាប់នៅទីនោះ ដោយមានឈាម និង របួសក្បាលផងដែរ។
ចំពោះករណីនេះ លោក វន ស៊ីផា អភិបាលស្រុកសាមគ្គីមានជ័យបាន ធ្វើការបដិសេធន៏ថា លោកមិនបានយកកាំភ្លើងបាញ់សត្វគោរបស់ប្រជាពលរដ្ឋនោះទេ ។ ហើយបើតាម លោក សេង ចិន្តា អធិការនគរបាលស្រុកសាមគ្គីមានជ័យថា សត្វគោដែលងាប់នោះ គឺងាប់ដោយសារត្រូវនិងដំថ្មតែប៉ុណ្ណោះ៕
តែយ៉ាងណា បើតាមម្ចាស់គោ គឺលោក ខែក គឿន អាយុ៤៥ឆ្នាំជាប្តី និង ប្រពន្ធឈ្មោះ ឡឹក ស្រី បានអះអាងថា គោរបស់គាត់ដែលងាប់នៅក្នុងបរិវេណសាលាស្រុក ពិតជាបានងាប់ដោយសារគ្រាប់កាំភ្លើងពិតប្រាកដមែន ដោយសារនៅស្នាមរបួសត្រង់ក្បាលសត្វគោ បានធ្លុះចូល ហើយពេលគាត់យកម្រាមដៃស្ទាបទៅឃើញ ដែលជាស្នាមគ្រាប់កាំភ្លើង៕
