បើតាមការបញ្ជាក់របស់លោកស្រី យក់ សម្បត្តិ មន្រ្តីជាន់ខ្ពស់ក្រសួងសុខាភិបាលថា មានករណីបុរសម្នាក់ទៀតបានស្លាប់ដោយសារជំងឺកូវីដ១៩ កាលពីល្ងាចថ្ងៃទី២៥ ខែមីនា ឆ្នាំ២០២១ ខណៈដែលអ្នកជំងឺរូបនោះមិនដឹងថា ខ្លួនបានឆ្លងវីរុសកូវីដ១៩ឡើយ។
តាមលោកស្រី យក់ សម្បត្តិ បុរសដែលស្លាប់រូបនោះ អាយុ៥៥ឆ្នាំ ជាមន្រ្តីនគរបាលចរារណ៍ នៅស្នងការដ្ឋាននគរបាលរាជធានីភ្នំពេញ មានស្រុកកំណើតនៅភូមិក្តីចាស់ ឃុំព្រែកហ្លង ស្រុកខ្សាច់កណ្តាល ខេត្តកណ្តាល។ គាត់បានចូលទៅមន្ទីរពេទ្យរុស្ស៉ី នៅវេលាម៉ោង១៥ និង៣០នាទី ថ្ងៃទី២៥ ខែមីនា ឆ្នាំ២០២១ ដោយស្ថិតក្នុងវិបត្តិផ្លូវដង្ហើមធ្ងន់ធ្ងរ គាំងបេះដូង និងបាត់បង់ស្មារតី។ អ្នកជំងឺបានស្លាប់នៅវេលាម៉ោង១៦រសៀលថ្ងៃទី២៥ ខែមីនា ឆ្នាំ២០២១។
ដោយជាករណីសង្ស័យ ក្រុមគ្រូពេទ្យក៏យកសំណាកទៅពិនិត្យ ក៏ទទួលបានលទ្ធផលវិជ្ជមានកូវីដ១៩។
ជនរងគ្រោះ មិនបានដឹងខ្លួនឯងថា មានផ្ទុកកូវីដនោះឡើយ ដោយកាលពី៤ថ្ងៃមុន គាត់បានទៅព្យាបាលនៅស្រុកកំណើតនៅភូមិក្តីចាស់ ឃុំព្រែហ្លួង ស្រុកខ្សាច់កណ្តាល ខេត្តកណ្តាល តែស្ថានភាពជំងឺកាន់តែធ្ងន់ ក៏ក្រុមគ្រួសារសម្រេចបញ្ជូនគាត់មកពេទ្យរុស្ស៊ី ដើម្បីព្យាបាលបន្ត តែជាអកុសលលោកបានទទួលមរណភាពតែម្តងនៅល្ងាចថ្ងៃដដែលនេះ៕
