នៅព្រឹកថ្ងៃទី២៤ ខែមីនា ឆ្នាំ២០២១ នេះ រោងចក្រខ្សែភ្លើង ឃ្យុងស៊ីង ក្នុងតំបន់សេដ្ឋកិច្ចពិសេស 7NG ស្ថិតនៅភូមិវិហារសួគ៌ ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ត្រូវបានអគ្គិភ័យ ឆាបឆេះ។
រោងចក្រនេះ មានម្ចាស់ឈ្មោះ ចាង សាងហូ អាយុ ៤៦ ឆ្នាំ ជាជនជាតិកូរ៉េខាងត្បូងហើយក្នុង រោងចក្រនេះ មានកម្មករ ដែលកំពុងធ្វើការ ចំនួន ១.៦៧៥ នាក់ ស្រី ១.៣១៨ នាក់។
យោងតាមរបាយការណ៍របស់ អធិការដ្ឋាននគរបាល ស្រុកខ្សាច់កណ្ដាល បានឲ្យដឹងថា ករណីអគ្គិភ័យនេះកម្លាំងជំនាញសណ្ដាប់ធ្នាប់ចរាចរណ៍ ស្រុកខ្សាច់កណ្ដាល បានប្រើរថយន្តពន្លត់អគ្គិភ័យ ស្រុកខ្សាច់កណ្ដាល ១គ្រឿង និងឡានទឹក របស់ 7NG ចំនួន ២ គ្រឿង ដោយប្រើប្រាស់ទឹកអស់ ចំនួន ២៥ ម៉ែត្រគីប ទើបរលត់ទាំងស្រុង។
សមត្ថកិច្ចបញ្ជាក់ថា អគ្គិភ័យនេះ បណ្ដាលមកពីឆ្លងចរន្ដអគ្គិសនី នៅក្បែរ រោងបាយ ហើយបានឆាបឆេះ ផ្នែករោងម៉ាស៊ីន រហូតដល់រោងបាយ តែមិនឆេះចូលកន្លែង កម្មករធ្វើការឡើយ។
ក្នុងហេតុការណ៍នេះ បានបណ្ដាលឲ្យកម្មករម្នាក់ រងរបួសស្រាល ឈ្មោះ ភឹម រដ្ឋា អាយុ ២៤ ឆ្នាំ រស់នៅភូមិព្រៃចាស់ ឃុំវិហារសួគ៌ ស្រុកខ្សាច់កណ្ដាល៕
