តាមសេចក្តីជូនដំណឹងរបស់ក្រសួងសុខាភិបាលនៅព្រឹកថ្ងៃទី២៦ ខែមករា ឆ្នាំ២០២១នេះបានបញ្ជាក់ថា គេបានរកឃើញករណីវិជ្ជមានវីរុសកូវីដ១៩ចំនួន២ករណីថ្មី។
ករណីឆ្លងថ្មី២ករណីនេះ ១ករណីគឺជាបុរសជនជាតិឥណ្ឌូនេស៊ី អាយុ២៤ឆ្នាំ ស្នាក់នៅខេត្តព្រះសីហនុ ជាអ្នកដំណើរមកពីប្រទេសឥណ្ឌូនេស៊ី បន្តជើងហោះហើរនៅប្រទេសសឹង្ហបូរី បានមកដល់កម្ពុជានៅថ្ងៃទី១២ ខែមករា ឆ្នាំ២០២១ ហើយករណីរកឃើញវិជ្ជមានវីរុសកូវីដ១៩ គឺនៅពេលធ្វើតេស្តវត្ថុសំណាកលើកទី២។
ចំណែក១ករណីទៀត គឺស្រ្តីជនជាតិខ្មែរ អាយុ២៣ឆ្នាំ ស្នាក់នៅសង្កាត់ប៉ោយប៉ែត ក្រុងប៉ោយប៉ែត បានធ្វើដំណើរមកពីប្រទេសថៃ និងមកដល់កម្ពុជានៅថ្ងៃទី១២ ខែមករា ឆ្នាំ២០២១ ហើយការរកឃើញ គឺនៅពេលធ្វើតេស្តសំណាកលើកទី៣។
ចំណែកករណីជាសះស្បើយចំនួន ៣នាក់ គឺមាន ២នាក់ជាអ្នកដំណើរចូលមកកម្ពុជា និង១នាក់ទៀតជាពលករធ្វើដំណើរមកពីប្រទេសថៃ៕
