ខេត្តបាត់ដំបង ៖ យោងតាមប្រភពព័ព៌មានពីមូលដ្ឋានបានឲ្យដឹងថា មន្ត្រីជំនាញនៃអធិការស្រុកបាណន់បានឃាត់ខ្លួនមុខសញ្ញាជូញដូរគ្រឿងញៀនចំនួន០៤នាក់ ជាមួយនឹងការដកហូតបានវត្ថុតាងមួយចំនួនផង តែនៅពេលនាំខ្លួនទៅដល់អធិការស្រុកបានត្រឹមមួយដង្ហើម ចង្រិត ក៏បានដោះលែងក្រុមជនសង្ស័យវិញទាំងយប់ ក្រោយពីដឹងថា ឃាត់ខ្លួនជនសង្ស័យប៉ះចំខ្សែមន្ត្រី
នគរបាលគ្នាឯងនៅក្នុងអធិការដ្ឋាន ។
ប្រភពបានឱ្យដឹងថា មុខសញ្ញាជនសង្ស័យប្រព្រឹត្តបទល្មើសគ្រឿងដែលត្រូវមន្ត្រីជំនាញ អធិការស្រុកបាណន់ឃាត់ខ្លួនទាំង០៤នាក់នោះ ត្រូវបានគេស្គាល់ម្នាក់គឺឈ្មោះ រ៉ន ដា តែបក្សពួក០៣នាក់ទៀតគេមិនទាន់ស្គាល់ឈ្មោះទេ ។
សាក្សីក្នុងភូមិបានឲ្យដឹងថា គេឃើញកម្លាំងសមត្ថកិច្ចមួយក្រុម បានចុះទៅឃាត់ខ្លួនក្រុមជនសង្ស័យនៅរសៀលថ្ងៃទី ២៧ មិថុនា នៅក្នុងភូមិបឹងក្រសាល ឃុំស្នឹង ស្រុកបាណន់។ សមត្ថកិច្ចបានចាប់វ៉ៃខ្នោះដៃជាប់គ្នា ហើយឲ្យពួកគេអង្គុយមួយកន្លែង និងបានឆែកឆេររកឃើញវត្ថុតាងមួយចំនួន ដែលគេសង្ស័យជា «ថ្មាំញៀន» ។
ក្រោយត្រួតពិនិត្យ និងប្រមូលបានភស្ដុតាង គេឃើញសមត្ថកិច្ចក៏ដឹកក្រុមជនសង្ស័យទាំង០៤នាក់ ចេញទៅកាន់អធិការដ្ឋាននគរបាលស្រុកបាណន់ ។ ប៉ុន្តែគេមិន ដឹងហេតុផលច្បាស់លាស់ចាប់មនុស្សច្រឡំ ឬ យ៉ាង ណានោះទេ ស្រាប់តែនៅព្រឹកព្រលឹមថ្ងៃទី២៨ មិថុនា បែរជាគេឃើញក្រុមជនសង្ស័យមកដល់ផ្ទះរៀងៗខ្លួន ។
ប្រភពបានបន្ថែមថា គេឃើញម្នាក់ឈ្មោះ រ៉ន ដា កំពុងរើអុសទម្លាក់ពីលើគោយន្តធ្វើព្រងើយ ធ្វើឲ្យអ្នកភូមិជ្រួញចិញ្ចើមឆ្ងល់គ្រប់ៗគ្នា ។ បើតាមប្រភពព័ត៌មានបានបង្ហើបឲ្យដឹងថា ក្នុងចំណោមជនសង្ស័យទាំង០៤នាក់នោះ មានម្នាក់ (សុំលាក់ឈ្មោះ) ជាប់ជាសាច់ញាតិមន្ត្រីម្នាក់នៅក្នុងអធិការដ្ឋាននគរបាលស្រុកបាណន់ ។
ប្រភពបានបញ្ជាក់ថា ក្រោយពីបញ្ជូនជនទាំង០៤នាក់ទៅដល់អធិការស្រុក គេឃើញមន្ត្រីម្នាក់នោះ (សុំលាក់ឈ្មោះ) បានព្យាយាមរត់ការសម្របសម្រូលជាមួយលោកអធិការ ដើម្បីដោះបញ្ចប់រឿងនេះទាំងយប់មុនពេលថ្ងៃរះ ទើបលោកអធិការសម្រេចដោះលែងក្រុមជនសង្ស័យទាំងអស់តែម្ដងទៅ ។
ប៉ុន្តែគេមិនបានដឹងថា តើសំណុំរឿងដោះស្រាយក្រៅ ច្បាប់នេះ លោក ហេង បារាំង អធិការស្រុកបាណន់បានរាយការណ៍ជូនលោកស្នងការខេត្តបានជ្រាបដែរ ឬយ៉ាងណានោះទេ ? ពាក់ព័ន្ធនឹងសំណុំរឿងឃាត់ខ្លួនមនុស្សចំនួន០៤នាក់ រួចដោះលែងវិញស្រេចតែចិត្តនេះ អ្នកកាសែតបានព្យាយាមទូរស័ព្ទទៅកាន់លោក ហេង បារាំង អធិការស្រុកបាណន់ នៅរសៀលថ្ងៃទី ២៨ ខែ មិថុនា ដើម្បីសុំការបំភ្លឺ តែមិនអាចទាក់ទងបានឡើយ។
ដោយឡែក លោក សុខ និមល ស្នងការរងផែនគ្រឿង ញៀនអះអាងងថាលោកមិនបានដឹងរឿងនេះទេ។ នៅពេលសាកសួរពីដំណើររឿងខាងលើនេះ លោក សុខ និមល បានបញ្ជាក់ថា លោកមិនបានដឹងរឿងដែលកើត ឡើងនៅអធិការស្រុកបាណន់ខាងលើនេះទេ ព្រោះគេមិនរាយការណ៍ តែលោកនឹងសាកសួររឿងនេះទៅលោកអធិការស្រុកបាណន់ ។
យ៉ាងណាក៏ដោយ ក្រុមការងារព័ត៌មាននិងប្រតិកម្មនៃស្នងការដ្ឋាននគរបាលខេត្តបាត់ដំបង បានជម្រាបជូនសារធារណជន អ្នកសារព័ត៌មាននិងអ្នកប្រេីប្រាស់បណ្តាញសង្គមឲ្យបានជ្រាបថា នៅថ្ងៃទី២៨ខែ មិថុនា ឆ្នាំ២០២៥នេះឃេីញការផ្សព្វផ្សាយក្នុងគេហទំព័រក្នុងស្រុក ផ្សព្វផ្សាយពីករណីនគរបាលស្រុកបាណន់ដោះលែងជនសង័្សយចំនួន ០៤នាក់ក្រោយឃាត់ខ្លួនបានបន្តិចព្រោះប៉ះចំខ្សែប៉ូលិសគ្នាឯង ។
ឃេីញការផ្សព្វផ្សាយបែបបេះលោក ឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង បានចាត់តាំងឱ្យធ្វេីការស្រាវជ្រាវជុំវិញព័ត៌មានដែល បបានលេីកឡេីងក្នុងគេហទំព័រខាងលេីនេះហេីយ។
ប៉ុន្តែលទ្ធផលនៃការស្រាវជ្រាវយ៉ាងណានោះមិនទាន់ដឹងនៅឡើយទេ រហូតមកដល់ព្រឹកថ្ងៃទី២៩ ខែមិថុនា ឆ្នាំ ២០២៥ នេះ៕
