ក្រសួងសុខាភិបាលកម្ពុជាបានបញ្ជាក់ថា កុមារាអាយុ ៣ឆ្នាំ៦ខែម្នាក់ ដែលរស់នៅភូមិព្រែកតាអាំ ឃុំបុសលាវ ស្រុកចិត្របុរី ខេត្តក្រចេះ ត្រូវបានរកឃើញមានវិជ្ជមានជំងឺផ្ដាសាយបក្សីប្រភេទហាស់៥អ៊ិន១ (H5N1)។ ករណីនេះត្រូវបានបញ្ជាក់ដោយវិទ្យាស្ថានជាតិសុខភាពសាធារណៈ កាលពីថ្ងៃទី២២ ខែមីនា ឆ្នាំ២០២៥។
កុមាររូបនេះត្រូវបាននាំមកដល់មន្ទីរពេទ្យក្នុងស្ថានភាពធ្ងន់ធ្ងរ ដោយមានរោគសញ្ញាដូចជា ក្ដៅខ្លួន ក្អក ហត់ខ្លាំង និងពិបាកដកដង្ហើម។ បច្ចុប្បន្ន កុមាររូបនេះកំពុងទទួលការព្យាបាលពិសេសពីក្រុមគ្រូពេទ្យជំនាញ ក្នុងការយកចិត្តទុកដាក់ខ្ពស់បំផុត។
តាមការស៊ើបអង្កេតដំបូង គ្រួសាររបស់កុមាររូបនេះមានចិញ្ចឹមមាន់ជាលក្ខណៈគ្រួសារ ហើយមានមាន់ជាច្រើនក្បាលងាប់ និងឈឺមុនពេលករណីនេះកើតឡើង។ សមាជិកគ្រួសារបានយកមាន់ងាប់ទាំងនោះមកធ្វើម្ហូប ដែលអាចជាប្រភពនៃការឆ្លងជំងឺ។
ក្រោយការរកឃើញករណីនេះ ក្រសួងសុខាភិបាល រួមជាមួយក្រសួងកសិកម្ម និងអាជ្ញាធរមូលដ្ឋាន បានចាត់វិធានការស្វែងរកប្រភពឆ្លង និងធ្វើការស៊ើបអង្កេតលើសត្វស្លាប និងមនុស្សដែលបានប៉ះពាល់។ ក្រសួងសុខាភិបាលក៏បានផ្ដល់ការព្រមានដល់ប្រជាពលរដ្ឋឱ្យប្រុងប្រយ័ត្ន និងរក្សាសុវត្ថិភាពក្នុងការប៉ះពាល់សត្វស្លាប ជាពិសេសមាន់ និងទា។
ក្រសួងសុខាភិបាលបានណែនាំថា ប្រសិនបើប្រជាពលរដ្ឋមានរោគសញ្ញាដូចជា ក្ដៅខ្លួន ក្អក ហូរសំបោរ ឬពិបាកដកដង្ហើម ហើយមានប្រវត្តិប៉ះពាល់នឹងសត្វស្លាបឈឺ ឬងាប់ក្នុងរយៈពេល១៤ថ្ងៃមុន គួរទាក់ទងមន្ទីរពេទ្យជាបន្ទាន់ ដើម្បីទទួលការពិនិត្យ និងព្យាបាល។ ការពន្យារពេលអាចបង្កឱ្យមានហានិភ័យខ្ពស់នៃការស្លាប់៕
