ព្រឹត្តិការណ៍បុណ្យសមុទ្រលើកទី១១ ជុំទី៣ ឆ្នាំ២០២៤ នៅលើទឹកដីខេត្តកំពត ក្នុងរយៈពេល៣ថ្ងៃ បានទាក់ទាញទេសចរជាតិ មកលេងកម្សាន្តសរុបចំនួន ៣៨៥,៥៥៣នាក់ កើនឡើង៤៤,៧% និងទេសចរបរទេស ចំនួន៣,៦១៥នាក់ កើនឡើង ១០៧,៤% ធៀបនឹងពិធីបុណ្យសមុទ្រឆ្នាំ២០២៣ ។
បើតាមក្រសួងទេសចរណ៍ ព្រឹត្តិការណ៍បុណ្យសមុទ្រលើកទី១១ ជុំទី៣ ឆ្នាំ២០២៤ នៅលើទឹកដីខេត្តកំពត បានប្រព្រឹត្តទៅប្រកបដោយ ភាពឱឡារិក, អធិកអធម, មានភាពរលូន, បានប្រព្រឹត្តទៅដោយសុខសុវត្ថិភាព, មានសណ្តាប់ធ្នាប់សាធារណៈល្អ, រក្សាបាននូវបរិស្ថានអនាម័យល្អ។
ចំពោះការតាំងពិព័រណ៌សមិទ្ធផល, មហោស្រពម្ហូបអាហារនិងភេសជ្ជៈ, ការតាំងពិព័រណ៌ពាណិជ្ជកម្មផលិតផលក្នុងស្រុក និងក្រៅស្រុក និងគម្រោងអភិវឌ្ឍន៍តំបន់ឆ្នេរ ព្រមទាំងការសម្តែងទស្សនីយភាពសិល្បៈ, ការប្រគុំតន្រ្តី, តន្រ្តីមហាជន, ព្រឹត្តិការណ៍កម្សាន្តសប្បាយជាច្រើនទៀត ក៏ទទួលបានការចូលទស្សនាជាច្រើនម៉ឺននាក់ និងមានការគាំទ្រយ៉ាងច្រើនផុសផុលពីភ្ញៀវជាតិ និងអន្តរជាតិ។
ដោយឡែកកម្មវិធីជំនួបផ្លាស់ប្តូរពាណិជ្ជកម្មទេសចរណ៍អន្តរជាតិឆ្នាំ២០២៤ ដែលជាព្រឹត្តិការណ៍អមលើកទី១ បានប្រព្រឹត្តទៅដោយជោគជ័យ ក្នុងនោះក្រុមហ៊ុនទេសចរណ៍មកពី៩ប្រទេស និងប្រតិបត្តិករទេសចរណ៍ក្នុងស្រុកបានឈានទៅចុះកិច្ចសន្យារៀបចំកញ្ចប់ទស្សនកិច្ចជំរុញការតភ្ជាប់ពីបណ្តាប្រទេសនានាមកកម្ពុជា និងពីកម្ពុជាទៅបណ្តាប្រទេសផ្សេងទៀត ជាពិសេសការបង្កើនកញ្ចប់ទស្សនកិច្ចទេសចរណ៍មកកាន់តំបន់ឆ្នេរសមុទ្រកម្ពុជា។
ក្នុងពិធីនោះ ក៏មានការដាក់ឱ្យដំណើរការសាកល្បងកំពង់ផែទេសចរណ៍អន្តរជាតិខេត្តកំពត ដែលជាសមិទ្ធផលថ្មី នឹងដើរតួជាច្រកចេញ-ចូល សម្រាប់ភ្ញៀវទេសចរ, ការតភ្ជាប់ជាមួយអ្នកធ្វើដំណើរក្នុងតំបន់ តាមច្រកសមុទ្រ ពីគោលដៅសំខាន់ៗនៅតាមតំបន់ឆ្នេរកម្ពុជា, ពីកំពង់ផែនានា រួមទាំងកំពង់ផែនៅខេត្តព្រះសីហនុ, ខេត្តកោះកុង និងកំពង់ផែនៅប្រទេសជិតខាង ព្រមទាំងពីគោលដៅផ្សេងៗទៀតចូលមកកាន់ខេត្តកំពត។
ក្រសួងទេសចរណ៍បញ្ជាក់ថា អ្វីដែលគួរឱ្យកត់សម្គាល់ និងជាទីមោទនៈនៃការរៀបចំពិធីបុណ្យសមុទ្រឆ្នាំ២០២៤នេះ គឺមានការចូលរួមកាន់តែផុលផុសពីគ្រប់ភាគីពាក់ព័ន្ធទាំងផ្នែករដ្ឋ និងឯកជន និងទទួលបានការចាប់អារម្មណ៍កាន់តែខ្លាំងពីបងប្អូនប្រជាពលរដ្ឋ ទេសចរណ៍ជាតិ និងអន្តរជាតិ៕
