ចៅហ្វាយស្រុកថាអត់ដឹង ខណៈប្រឡាយរដ្ឋប្រមាណជាង១០០ម៉ែត្រ ត្រូវបានគេចាក់លុប នៅចំណុចជាប់របងរោងចក្របោកគក់ ផ្លូវជាតិលេខ៣ ក្នុងស្រុកគងពិសី

កំពង់ស្ពឺ៖ ករណីលួចលុបប្រឡាយរដ្ឋប្រមាណជាជាង១០០ម៉ែត្រ ដែលអ្នកលក់ដូរនៅលើទីតាំងនោះហៅថា ប្រឡាយចូលបុរី ឡេង ណាវ៉ាត្រា នៅចំណុចផ្លូវជាតិលេខ៣ ជាប់របងរោងចក្របោកគក់ សុីង បាងផេរភីង អិនដាសស្រ្ទៀល (ខេមបូឌា) នៅភូមិក្រាំងទ្រា ឃុំព្រះនិព្វាន ស្រុកគងពិសី ខេត្តកំពង់ស្ពឺ។ នេះបើតាមប្រភពដែលបណ្ដាញសារព័ត៌មាន ពេញចិត្តមេឌាទទួលបាន។

បើតាមប្រភពពីពលរដ្ឋបានឲ្យដឹងដែរថា ប្រឡាយនេះ គេលុបយូរហើយ គេហៅថា ប្រឡាយចូលបុរី ឡេង ណាវ៉ាត្រា ហើយប្រឡាយនេះវែងណាស់តដល់ស្ទឹងព្រែកត្នោតនិងតភ្ជាប់ពីផ្លូវជាតិលេខ៣ ទៅភូមិព្រៃទទឹង ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល។

បើតាមលោក ហាន ពិសិដ្ឋ អភិបាលស្រុកគងពិសីបានឆ្លើយយ៉ាងខ្លីថា «ខ្ញុំអត់បានព័ត៌មាននឹងដែរ នឹងអោយក្រុមការងារជំនាញពិនិត្យ»។ ពាក់ព័ន្ធករណីលួចលុបប្រឡាយរដ្ឋខាងលើនេះ បណ្ដាញសារព័ត៌មាន ពេញចិត្តមេឌា មិនអាចសុំការបំភ្លឺបន្ថែមពីលោកចៅហ្វាយស្រុក ហាន ពិសិដ្ឋ បាននោះទេ នៅព្រឹកថ្ងៃទី០៦ ខែធ្នូ ឆ្នាំ២០២៤នេះ ព្រោះទូរស័ព្ទរបស់លោកខលចូលតែគ្មានអ្នកលើក។

ទាក់ទិនករណីខាងលើនេះ បើតាមប្រភពពីមន្ត្រីរដ្ឋបាលសាលាខេត្តកំពង់ស្ពឺបានប្រាប់ឲ្យដឹងថា គឺមានតែលោក គង់ ឈុនលី នាយករដ្ឋបាលស្តីទីសាលាខេត្តកំពង់ស្ពឺទេ ដែលអាចដឹងរឿងខាងលើនេះ។

បណ្ដាញសារព័ត៌មានពេញចិត្តមេឌា មិនអាចសុំការបញ្ជាក់បន្ថែមឬបំភ្លឺពីលោក គង់ ឈុនលី នាយករដ្ឋបាលស្តីទីសាលាខេត្តកំពង់ស្ពឺបាននៅឡើយនោះទេ ដោយសារពុំមានលេខទូរស័ព្ទអាចទំនាក់ទំនងបាន៕

បណ្ដាញសារព័ត៌មានពេញចិត្តមេឌា និងផ្សាយជូនបន្ថែមទៀត នៅពេលដែលទទូលបានព័ត៌មានថ្មីៗ