សាលាដំបូងខេត្តកណ្តាលកាលពីថ្ងៃចន្ទ (២ ធ្នូ) បានសម្រេចដាក់ទោសស្ត្រីជនជាតិហ្វីលីពីនចំនួន១៣នាក់ ឱ្យជាប់ពន្ធនាគាររយៈពេល៤ឆ្នាំ ប៉ុន្តែអនុវត្តទោស២ឆ្នាំ ក្រោយរកឃើញពាក់ព័ន្ធនឹងករណីពពោះជំនួស ដើម្បីយកកូនទៅលក់នៅក្រៅប្រទេស។ ក្នុងករណីនេះ ក៏មានស្ត្រីជនជាតិខ្មែរម្នាក់ដែលជាអ្នកធ្វើម្ហូប និងថែរក្សាស្រ្តីហ្វីលីពីនទាំង១៣នាក់នោះ ត្រូវបានតុលាការចោទពីបទរួមគំនិត ហើយត្រូវបានផ្តន្ទាទោសដាក់ពន្ធនាគាររយៈពេល៦ខែ ប៉ុន្តែអនុវត្តទោសរយៈពេល២ខែ១ថ្ងៃ។
កាលពីថ្ងៃទី២៣ ខែកញ្ញា ប៉ូលិសកម្ពុជាបានរកឃើញស្ត្រីជនជាតិហ្វីលីពីនចំនួន ២០ នាក់ ដែលសង្ស័យថាពាក់ព័ន្ធនឹងការពពោះជំនួសខុសច្បាប់នៅកម្ពុជា ក្នុងពេលកម្លាំងសមត្ថកិច្ចឆ្មក់ចូលផ្ទះវីឡាមួយកន្លែងនៅក្នុងខេត្តកណ្តាល។ ក្នុងចំណោមស្រ្តី ២០ នាក់នោះ ស្រ្តីហ្វីលីពីន ៧ នាក់ ដែលមិនទាន់មានផ្ទៃពោះ ត្រូវបានបញ្ជូនទៅប្រទេសហ្វីលីពីនវិញ។
បើតាមសាលាដំបូងខេត្តកណ្តាល យោងតាមមាត្រា៩៨៧ នៃក្រមរដ្ឋប្បវេណីបានកំណត់ថា ស្ត្រីដែលបានសម្រាលកូន គឺជាម្តាយរបស់កូន ប៉ុន្តែក្នុងករណីសំណុំរឿងនេះ ជាការសម្រេចដែលមានភស្តុតាងច្បាស់លាស់ និងរឹងមាំដែលបង្ហាញថា ស្ត្រីជនជាតិហ្វីលីពីនទាំងនេះ មានចេតនាពពោះជំនួស ដើម្បីបង្កើតកូនក្នុងគោលបំណងលក់-ដូរ ទៅឱ្យអ្នកទីបី ជាថ្នូរនឹងប្រាក់។ អំពើនេះត្រូវបានកំណត់ថាជាបទល្មើសលក់-ដូរមនុស្ស ដែលបានន័យថា ស្ត្រីដែលពពោះជំនួស ក្នុងគោលបំណងបង្កើតកូន ដើម្បីលក់-ដូរ ទទួលប្រាក់កម្រៃ ត្រូវចាត់ទុកជាជនល្មើស តាមច្បាប់នៃប្រទេសកម្ពុជា។ ការធ្វើអាជីវកម្មផ្លូវភេទ គឺជាបទល្មើសមួយដែលបានធ្វើឱ្យប៉ះពាល់យ៉ាងធ្ងន់ធ្ងរដល់សន្តិសុខ សណ្តាប់ធ្នាប់សាធារណៈ ជាពិសេសប៉ះពាល់យ៉ាងធ្ងន់ធ្ងរដល់សិទ្ធិជាមនុស្សរបស់ទារក និងកុមារ ដែលត្រូវគាំពារ និងការពារដោយច្បាប់ជាតិ និងច្បាប់អន្តរជាតិ៕
