អ្នកនាំពាក្យក្រសួងមហាផ្ទៃ លោកនាយឧត្តមសេនីយ៍ ខៀវ សុភ័គ បានថ្លែងនៅរសៀលថ្ងៃនេះថា ក្រសួងមហាផ្ទៃបានសម្រេចបញ្ចប់មុខតំណែងលោក អ៊ុក កុសល ពីស្នងការនគរបាលខេត្តកំពង់ធំហើយ ក្រោយពីការស៊ើបអង្កេតរកឃើញថា លោកបានប្រព្រឹត្តដូចការប្តឹងមែន។
លោក អ៊ុក កុសល ត្រូវបាននគរបាលនារីៗមួយចំនួន ដែលស្ថិតនៅក្រោមឱវាទរបស់លោក ប្តឹងទៅសម្តេច ស ខេង រដ្ឋមន្រ្តីក្រសួងមហាផ្ទៃថា លោកស្នងការរូបនេះ បានបៀតបៀនកេរ្តិ៍ខ្មាសលើពួកនាង។
លោក ខៀវ សុភ័គ បានបន្ថែមថា លោក អ៊ុក កុសល ត្រូវបានទម្លាក់ឋានន្តរស័ក្តិពីផ្កាយ២ (ឧត្តមសេនីយ៍ទោ) មកនៅត្រឹមស័ក្តិ៥ (វរសេនីយ៍ឯក) ហើយក្រសួងមហាផ្ទៃ បានស្នើឲ្យទម្លាក់ស័ក្តិ២ថ្នាក់ថែមទៀត (អាចនៅត្រឹមស័ក្តិ៣)៕
