យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម ចេញផ្សាយនៅព្រឹកថ្ងៃទី១ ខែកញ្ញា ឆ្នាំ២០២០នេះ បានបញ្ជាក់ថា ពីថ្ងៃទី២ ដល់ថ្ងៃទី៨ ខែកញ្ញា ឆ្នាំ២០២០ ប្រទេសកម្ពុជាទទួលរងឥទ្ធិពលពីជ្រលង នៃប្រព័ន្ធសម្ពាធទាប ដែលអូសបន្លាយឆ្លងកាត់ភាគខាងជើងប្រទេសថៃភាគកណ្តាល ប្រទេសឡាវ និងប្រទេសវៀតណាម។
ស្ថានភាពបែបនេះ នឹងធ្វើឲ្យបណ្តាខេត្តតំបន់វាលទំនាបកណ្តាល អាចមានភ្លៀងធ្លាក់រាយប៉ាយក្នុងកម្រិតពីមធ្យមទៅបង្កួរ ក្នុងនោះក៏មានផ្នែកមួយចំនួន នៃបណ្តាខេត្តនៅតំបន់វាលទំនាបភាគកណ្តាល និងភាគពាយ័ព្យ នឹងអាចមានភ្លៀងធ្លាក់ច្រើន។
សម្រាប់បណ្តាខេត្តនៅតំបន់ជួរភ្នំដងរែក និងខ្ពង់រាបឦសាន នឹងអាចមានភ្លៀងធ្លាក់រាយប៉ាយក្នុងកម្រិតពីមធ្យម ទៅបង្គួរ ហើយសម្រាប់បណ្តាខេត្តនៅតំបន់មាត់សមុទ្រវិញ នឹងអាចមានភ្លៀងធ្លាក់ពីតិច ទៅមធ្យម។
យ៉ាងណាក៏ដោយ ក្រសួងស្នើដល់បងប្អូនប្រជាពលរដ្ឋ សូមប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្រ្តាក់ ដែលអាចកើតមាននៅផ្នែកមួយចំនួន នៃបណ្តាខេត្តស្ថិតនៅតំបន់វាលទំនាបភាគកណ្តាល៕
