ក្រសួងអប់រំ យុវជន និងកីឡា បានសម្រេចអនុញ្ញាតឲ្យគ្រឹះស្ថានសិក្សាសាធារណៈ របស់រដ្ឋគ្រប់កម្រិត នៅទីរួមខេត្តចំនួន៤ អាចបើកដំណើរការឡើងវិញ ចាប់ពីថ្ងៃទី០៧ ខែកញ្ញាតទៅ ហើយរាជធានី-ខេត្តផ្សេងៗទៀត នឹងអនុញ្ញាតជាបន្តបន្ទាប់នាពេលក្រោយ។ នេះបើតាមការបញ្ជាក់របស់ លោក រស់ សុវាចា អ្នកនាំពាក្យក្រសួងអប់រំ។
បើតាមការបញ្ជាក់របស់អ្នកនាំពាក្យរូបនេះ សាលានៅទីរួមខេត្តទាំង៤នោះ រួមមាន ទីរួមខេត្តក្រចេះ ស្ទឹងត្រែង រតនគីរី និងមណ្ឌលគីរី។ ហើយការសម្រេចឲ្យសាលានៅទីរួមខេត្តទាំង៤នោះបើកដំណើរការឡើងវិញ គឺដោយសារតែខេត្តទាំងនោះមានកម្រិតហានិភ័យទាប ចំពោះជំងឺកូវីដ១៩។
ដោយឡែកសម្រាប់គ្រឹះស្ថានសិក្សាឯកវិញ លោក រស់ សុវាចា បានបញ្ជាក់ថា ក្រសួងអប់រំនឹងអនុញ្ញាតឲ្យគ្រឹះស្ថានសិក្សាឯកជន ពីកម្រិតមត្តេយ្យសិក្សាដល់ឧត្តម សិក្សាបើកដំណើរការឡើងវិញ បន្ទាប់ពីមានការចុះពិនិត្យ និងវាយតម្លៃដោយផ្ទាល់ដល់ទីតាំងគ្រឹះស្ថានសិក្សា។ ក្នុងនោះគ្រឹះស្ថានសិក្សាឯកជន ត្រូវដាក់ពាក្យស្នើសុំបើក មកក្រសួងអប់រំ យុវជន និងកីឡាតាមរយៈមន្ទីរអប់រំ យុវជន និងកីឡាផងដែរ ដោយគ្រឹះស្ថានសិក្សាឯកជនត្រូវចុះកិច្ចព្រមព្រៀងជាមួយក្រសួងអប់រំ យុវជន និងកីឡាមុនការបើកដំណើរការ៕
