ក្រសួងហិរញ្ញវត្ថុវៀតនាម បានដាក់សំណើសុំពន្យារពេលយកពន្ធ ដែលមានតម្លៃជាទឹកប្រាក់សរុប ៣,៤ ពាន់លានដុល្លារអាមេរិក ក្នុងរយៈពេល ៥ខែ ចំពោះអាជីវកម្មដែលរងផលប៉ះពាល់ដោយមេរោគ Covid-19។ នេះបើតាមការផ្សាយចេញពីព័ត៌មាន VN Express។
កញ្ចប់ថវិកាដែលត្រូវមានការយល់ព្រមសម្រេចពីនាយករដ្ឋមន្ត្រីនេះ គឺជាផែនការពង្រីកបន្ថែម ក្នុងតម្លៃ ១,៣ ពាន់លានដុល្លារអាមេរិក ដែលត្រូវបានប្រកាសដោយក្រសួងហិរញ្ញវត្ថុវៀតណាម កាលពីដើមខែមីនានេះ។
ក្រោមគម្រោងថ្មីនេះ វៀតណាម នឹងជំរុញបន្តជំរុញពន្យារពេលយកពន្ធលើវិស័យច្រើនថែមទៀត និងបន្ថែមលើប្រភេទពន្ធផ្សេងទៀត។ តួយ៉ាង ពន្ធលើប្រាក់ចំណូលបុគ្គល និងពន្ធលើដីធ្លីជាដើម គឺត្រូវបានពន្យារពេលយកដូចគ្នាដែរ។
មានវិស័យច្រើនជាង ២០ នឹងត្រូវទទួលបានផលប្រយោជន៍ពីការពន្យារពេលយកពន្ធនេះ រួមទាំងវិស័យកសិកម្ម, ការផលិតយានយន្ដ, សេវាម្ហូបអាហារ, អាហារសមុទ្រ, ការដឹកជញ្ជូន, វាយនភណ្ឌ និងទេសចរណ៍។
អាជីវកម្មនៅក្នុងវិស័យទាំងនេះ បានរាយការណ៍ថា ពួកគេមានការប៉ះពាល់ខាតបង់ ដោយសារការីករាលដាលនៃមេរោគ Covid-19 ដែលត្រូវបានកំណត់ថា ធ្វើឲ្យវិស័យទេសចរណ៍ត្រូវចំណាយ ៧ពាន់លានដុល្លារអាមេរិក និងឧស្សាហកម្មវាយនភណ្ឌ នឹងត្រូវចំណាយ ៤៦៩ លានដុល្លារអាមេរិក។
ក្រុមហ៊ុននាំចេញអាហារសមុទ្រ ទទួលរងការលុបចោលនូវកិច្ចសន្យា ដោយសារតែអ្នកបញ្ជាទិញអឺរ៉ុប និងប្រទេសចិន ខណៈដែលភោជនីយដ្ឋាននៅទីក្រុងហានូយ និងហូជីមិញ ភាគច្រើន គឺត្រូវបានបញ្ជាឲ្យបិទទ្វារ។
បើតាមលិខិតសំណើដែលបានដាក់នោះ ម្ចាស់អាជីវកម្ម ត្រូវបានអនុញ្ញាតឲ្យលើកការទូទាត់ពន្ធលើអាករតម្លៃបន្ថែម (Value-added Tax) នៃត្រីមាសទី១ និងទី២ ទៅទូទាត់នៅក្នុងត្រីមាសទី៣ និងទី៤ ជំនួសវិញ។
ការសម្រួលផ្នែកពន្ធដារនេះ គឺជាកិច្ចខិតខំប្រឹងប្រែងរបស់រដ្ឋាភិបាលវៀណាម ក្នុងការកាត់បន្ថយការខាតបង់សេដ្ឋកិច្ច ដែលត្រូវបានគេកំណត់ថា នឹងធ្វើឲ្យកំណើនផលិតផលក្នុងស្រុកសរុបរបស់ប្រទេសនេះ សម្រាប់ឆ្នាំ២០២០ គឺមានការធ្លាក់ចុះទាបក្នុងរយៈពេល ៧ឆ្នាំមកនេះ ដែលនឹងមានមកនៅត្រឹមតែ ៥,៩៦%។
កាលពីឆ្នាំមុន សេដ្ឋកិច្ចវៀតណាមមានកំណើន ៧,០២% ដែលជាកំណើនខ្ពស់បំផុតមិនធ្លាប់មាន ក្នុងមួយទសវត្សរ៍ចុងក្រោយនេះ៕
អត្ថបទ៖ ខេមបូណូមីស
