(ភ្នំពេញ) ៖ បើតាមសេចក្តីរាយការណ៍បានឱ្យដឹងថា ទីតាំងល្បែងភ្នាល់បាល់តាមអនឡាញ យីហោ ម្លប់ជ្រៃ ស្ថិតនៅចំណុចផ្ទះលេខ៧៨០ តាមបណ្តោយផ្លូវលេខ៤៧៤ ក្នុងសង្កាត់បឹងត្របែក ខណ្ឌចំការមន ពេលនេះបានបើកដំណើរការទទួលអ្នកលេងវិញហើយ ក្រោយពីផ្អាកអស់មួយរយៈមក។
តាមប្រភពពីប្រជាពលរដ្ឋដែលរស់នៅក្បែរទីតាំងខាងលើបានប្រាប់ឱ្យដឹងថា ទីតាំងល្បែងមួយនេះមិនខ្លាចអាជ្ញាធរ ឬសមត្ថកិច្ចនោះឡើយ ព្រោះម្ចាស់ទីតាំងគេមានខ្សែធំ ហើយជារៀងរាលថ្ងៃ គេឃើញមានមនុស្សម្នាចេញចូលចាក់ទាំងយប់ទាំងថ្ងៃ។
ប្រជាពលរដ្ឋ ក៏បានបញ្ជាក់ដែរថា ទីតាំងខាងលើនេះធ្លាប់ត្រូវបានសមត្ថកិច្ចចុះធ្វើការបង្ក្រាបចំនួន២ដងរួចមកហើយ ប៉ុន្តែនៅតែអាចបេីកឡើងវិញបាន ដោយគេសង្ស័យថា ប្រហែលជាមានការបើកភ្លើងខៀវ ពីអាជ្ញាធរជាក់ជាមិនខាន។
យ៉ាងណាក៏ដោយ ប្រជាពលរដ្ឋស្នើដល់អាជ្ញាធរ ជាពិេសស លោក ថេង សុថុល អភិបាលខណ្ឌចំការមន សូមជួយមើលទីតាំងល្បែងស៊ីសងក្នុងមូលដ្ឋានផង ព្រោះបើតាមដឹងក្នុងមូលដ្ឋានខណ្ឌចំការមននេះ មានល្បែងស៊ីសង ភ្នាល់បាល់តាមប្រព័ន្ធអុីនធើណេតជាច្រើនកន្លែង ដែលគេធ្វើការផ្សាយចេញពី(កាស៊ីណូ)កំពុងបើកដំណើរការយ៉ាងរលូន ខណៈសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តែងតែប្រកាសប្រាប់ឱ្យអាជ្ញាធរបង្រ្កាបល្បែងស៊ីសងក្នុងមូលដ្ឋានរបស់ខ្លួននោះ៕
ដោយ:សុិន ខ្វាន់ឆា
ទំនាក់ទំនងព័ត៌មាន:010840732/061881299