ករណីសមត្ថកិច្ចឆ្មក់បង្រ្កាបទីតាំងកម្សាន្តមួយកន្លែងស្ថិតនៅនៅតាមបណ្តោយមហាវិថីព្រះមុនីវង្ស ក្នុងសង្កាត់បឹងកេងកង២ ខណ្ឌបឹងកេងកង កាលពីរំលងអធ្រាត្រឈានចូលថ្ងៃទី១៩ ខែឧសភា ឆ្នាំ២០២១នោះ ឥឡូវនេះថៅកែក្លឹប និងបុគ្គលិកដែលជាជនជាតិចំនួន១០ ត្រូវសមត្ថកិច្ចបញ្ជូនទៅកាន់តុលាការនៅថ្ងៃទី២២ ឧសភានេះ ចំណែកភ្ញៀវដែលចូលទៅកម្សាន្តចំនួន ៣៤នាក់ ត្រូវពិន័យម្នាក់ៗ ៥លានរៀល។
ពួកគេត្រូវបានចោទចំពោះការល្មើសទៅនឹងបម្រាមរបស់រដ្ឋបាលរាជធានីភ្នំពេញ ស្តីពីការបង្ការ និងទប់ស្កាត់ការឆ្លងរាលដាលវីរុសកូវីដ១៩ ។
គួររំលឹកថា កាលពីយប់រំលងអធ្រាតថ្ងៃទី១៨ ឈានចូលថ្ងៃទី១៩ សមត្ថកិច្ចចម្រុះនៃស្នងការដ្ឋាននគរបាលរាជធានីភ្នំពេញ បានធ្វើការចុះបង្ក្រាបទីតាំងក្លឹបមួយនៅតាមបណ្តោយផ្លូវព្រះមុន្នីវង្ស សង្កាត់បឹងកេងកង២ ខណ្ឌបឹងកេងកង ដោយបានធ្វើការឃាត់ខ្លួនមនុស្សសរុបចំនួន ៤៥នាក់ ដោយមានជនជាតិចិនចំនួន ២៦នាក់ (ស្រី ៧នាក់ ) ជនជាតិវៀតណាមចំនួន ៧នាក់ស្រី ជនជាតិកូរ៉េចំនួន០១នាក់ប្រុស ជនជាតិម៉ាឡេសុីចំនួន០១នាក់ប្រុស និងជនជាតិខ្មែរចំនួន ១០នាក់ ( ស្រី ៥នាក់ ) ព្រមទាំងបានដកហូតវត្ថុតាងមួយចំនួន និងសារធាតុញៀនសរុបចំនួន ៣៧៩.៣២ ក្រាម និង ៨០ មីលីលីត្រ ។
បន្ទាប់ពីដំណើរការធ្វើតេស្តរកមេរោគកូវីដ-១៩ ដោយក្រុមគ្រូពេទ្យ ជាលទ្ធផលគឺអវិជ្ជមានទាំងអស់ ជំហ៊ានបន្ទាប់សមត្ថកិច្ចជំនាញនៃការិយាល័យប្រឆាំងគ្រឿងញៀន បានធ្វើតេស្តរកសារធាតុញៀនរួចមក ជាលទ្ធផលបានរកឃើញអ្នកដែលមានវិជ្ជមានសារធាតុញៀនចំនួន ៦នាក់ និងអ្នកពាក់ព័ន្ធ ចំនួន៥នាក់ទៀតពាក់ព័ន្ធនឹងការប្រេីប្រាស់ ចែកចាយ សារធាតុញៀន ហេីយសមត្ថកិច្ចកំពុងតែរៀបចំសំណុំរឿងបញ្ជូនជនទាំង១១នាក់នេះទៅតុលាការដើម្បីអនុវត្តបន្តតាមនីតិវិធីច្បាប់ ។
ចំណែកឯភ្ញៀវចំនួន ៣៤នាក់ ( ស្រី១៨នាក់) រួមមានជនជាតិចិន ១៥នាក់ ជនជាតិវៀតណាម ០៧នាក់ ជនជាតិខ្មែរ ១០នាក់ ជនជាតិកូរ៉េ ១នាក់ និងជនជាតិម៉ាឡេសុីម្នាក់ ដែលបានទៅលេងនៅក្លឹបកំសាន្តនោះ ដែលល្មើសទៅនឹងវិធានការសុខាភិបាល គឺត្រូវបានធ្វើការពិន័យជាទឹកប្រាក់ចំនួន ៥លានរៀលក្នុងម្នាក់ និងបានធ្វើកិច្ចសន្យាណែនាំអប់រំឲ្យត្រឡប់ទៅគេហដ្ឋានវិញ ៕
