កាលពីថ្ងៃ១៨ ខែមេសា ឆ្នាំ២០២១ម្សិលមិញ សមត្ថកិច្ចនគរបាលឈរជើងគោលដៅក្រោលគោ ស្រុកស្វាយជ្រុំ ខេត្តស្វាយរៀង បានធ្វើការឃាត់ខ្លួនអ្នកសារព័ត៌មានម្នាក់ ពាក់ព័ន្ធនឹងករណីលួចនាំមនុស្សពីភ្នំពេញ ទៅកាន់ខេត្តស្វាយរៀង ដែលជាការល្មើសនឹងសេចក្តីសម្រេចរបស់រាជរដ្ឋាភិបាល ស្តីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនជាអ្នកសារព័ត៌មាន នៅស្រុករំដួល បានស្នើសុំសមត្ថកិច្ចប្រចាំការនៅចំណុចគោលដៅក្រោលគោ ស្រុកស្វាយជ្រុំ ព្រំប្រទល់ស្វាយរៀង-ព្រៃវែង ទៅបំពេញបេសកកម្មនៅភ្នំពេញ។ លុះពេលទៅដល់ភ្នំពេញ ក៏បានទៅលួចនាំយកពលករដែលទើបមកពីកូរ៉េចំនួន០២នាក់ (បានអនុវត្តចត្តាឡីស័ក១៤ថ្ងៃរួច) មកស្រុកកំណើត ដោយយកថ្លៃចំនួន ៣៥០ដុល្លារ តែពេលមកដល់ចំណុចគោលដៅក្រោលគោ ស្រុកស្វាយជ្រុំ ក៏ត្រូវសមត្ថកិច្ចពិនិត្យ សួរនាំ និងធ្វើការឃាត់ខ្លួនតែម្តង។
ករណីនេះ សមត្ថកិច្ច នៃស្នងការដ្ឋាននគរបាលខេត្តស្វាយរៀង បាននិងកំពុងកសាងសំណុំរឿងបញ្ជូនទៅសាលាដំបូងខេត្តស្វាយរៀង ដើម្បីផ្តន្ទាទោសតាមច្បាប់៕
