ក្រសួងសុខាភិបាលកម្ពុជា បានជូនដំណឹងនៅថ្ងៃនេះថា ចាប់ពីថ្ងៃទី១ ខែមេសា ឆ្នាំ២០២១តទៅ ក្រសួងនឹងរៀបចំធ្វើយុទ្ធនាការចាក់វ៉ាក់សាំងស៊ីណូវ៉ាក់ ប្រឆាំងនឹងជំងឺកូវីដ១៩ ក្នុងក្របខណ្ឌទូទាំងប្រទេស។
ក្រុមគោលដៅដែលនឹងត្រូវចាក់វ៉ាក់សាំងស៊ីណូវ៉ាក់ ដែលផ្តើមពីថ្ងៃទី១ ខែមេសា ឆ្នាំ២០២១នេះ គឺមានចំនួន ៧៤៥,០០០នាក់ ជាក្រុមគ្រូពេទ្យ បុគ្គលិក មន្រ្តីសុខាភិបាលជួរមុខ, រដ្ឋសភា ព្រឹទ្ធសភា និងក្រុមគ្រួសារ, អ្នកសារព័ត៌មានដែលពុំទាន់បានចាក់ពីមុន, មន្រ្តីរាជការស៊ីវិល រួមទាំងបុគ្គលិកកិច្ចសន្យាទាំងអស់នៅគ្រប់ក្រសួង ស្ថាប័ន នៅថ្នាក់ជាតិ និងថ្នាក់ក្រោមជាតិ រួមទាំងសាស្រ្តាចារ្យ គ្រូបង្រៀន នៅតាមគ្រឹះស្ថានបណ្តុះបណ្តាលនានាទូទាំងប្រទេស, មន្រ្តី បុគ្គលិកបម្រើការ នៃអគ្គិសនីកម្ពុជាទូទាំងប្រទេស, មន្រ្តីអាជ្ញាធរជាតិទាំងអស់, មន្រ្តីគណៈមេធាវី, មន្រ្តីសាលាក្តីខ្មែរក្រហម, មន្រ្តីលេខាធិការដ្ឋានអាកាសចរស៊ីវល និងក្រុមហ៊ុនអាកាសចរនានា, ក្រុមហ៊ុនរ៉ូយ៉ាល់គ្រុប កាណាឌីយ៉ា និង កម្មករ-កម្មការិនីនៅតាមរោងចក្រមួយចំនួន ដែលបានសម្របសម្រួលរៀបចំដោយក្រសួងការងារ និងបណ្តុះបណ្តាលវិជ្ជាជីវៈ។
