ក្រសួងធនធានទឹក និងឧតុនិយមបានឲ្យដឹងនៅព្រឹកថ្ងៃទី២៦ ខែកញ្ញា ឆ្នាំ២០២០នេះថា ប្រព័ន្ធសម្ពាធទាបបានរំកិលអូសបន្លាយឆ្លងកាត់លើភាគខាងជើងប្រទេសថៃ ប្រទេសឡាវ និងភាគកណ្តាលប្រទេសវៀតណាម, ហើយថ្ងៃបន្តបន្ទាប់នេះ ប្រព័ន្ធសម្ពាធទាបនឹងរំកិលចុះមកក្រោមឆ្លងកាត់លើភាគខាងជើងប្រទេសកម្ពុជា។
តាមការបញ្ជាក់របស់ក្រសួងថា លក្ខណៈបែបនេះ នឹងធ្វើឲ្យអាកាសធាតុនៅព្រះរាជាណាចក្រកម្ពុជា នៅថ្ងៃទី២៧-២៩ ខែកញ្ញា នឹងមានភ្លៀងធ្លាក់រាយប៉ាយ និងកើនឡើងជាលំដាប់ស្ទើរក្របខណ្ឌទូទាំងប្រទេស ជាពិសេសនៅតំបន់ភាគពាយ័ព្យជាប់ប្រទេសថៃ និងខេត្តជាប់មាត់សមុទ្រ ដែលលើផ្ទៃសមុទ្រអាចមានភ្លៀង ខ្យល់បងក់ខ្លាំង ផ្គរ រន្ទះ និងរលកសមុទ្រខ្ពស់ៗ៕
