កម្លាំងសមត្ថកិច្ចចុះបង្ក្រាបករណីជួញដូរ និងដឹកជញ្ជូនគ្រឿងញៀនឆ្លងដែនបង្កប់ដឹកតាមគោយន្ត រឹបអូសបានថ្នាំញៀនប្រមាណ ១៥៩,៤៤៩គីឡូក្រាម នៅភូមិអន្លង់ស្វាយ ឃុំព្រះរំកិល ស្រុកបូរីអូស្វាយសែនជ័យ ខេត្តស្ទឹងត្រែង។
មន្ទីរប្រឆាំងគ្រឿងញៀន បានឱ្យដឹងនៅរសៀលថ្ងៃទី១០ ខែមករា ឆ្នាំ២០២៤ ថា កាលពីថ្ងៃទី០៨ ខែមករា ឆ្នាំ២០២៤ វេលាម៉ោង៣:៤០នាទីទៀបភ្លឺកម្លាំងជំនាញ (ក៩) នៃមន្ទីរប្រឆាំងបទល្មើសគ្រឿងញៀន សហការជាមួយកម្លាំងនគរបាលខេត្តស្ទឹងត្រែង បានបង្រ្កាបករណីជួញដូរ និងដឹកជញ្ជូនឆ្លងដែនដោយខុសច្បាប់នូវសារធាតុញៀន ស្ថិតនៅអូរធំ ជាំតាលឺម ភូមិអន្លង់ស្វាយ ឃុំព្រះរំកិល ស្រុកបូរីអូស្វាយសែនជ័យ ខេត្តស្ទឹងត្រែង។
វត្ថុតាងដែលកម្លាំងសមត្ថកិច្ចដកហូតបានរួមមាន៖ គ្រឿងញៀនប្រភេទមេតំហ្វេតាមីន ទម្ងន់១៦០ដុំ ស្មើនឹងទម្ងន់ ១៥៩,៤៤៩គីឡូក្រាម ទូរសព្ទ០១គ្រឿង និងគោយន្តកន្ត្រៃចំនួន១គ្រឿង។ បច្ចុប្បន្នកម្លាំងជំនាញបាននឹងកំពុងស្រាវជ្រាវបន្តស្វែងរកជនសង្ស័យទាំង២នាក់ដែលបានរត់គេចខ្លួនបាត់។ ចំពោះករណីនេះដែរ ត្រូវបានកម្លាំងជំនាញរៀបចំសំណុំរឿងបញ្ជូនទៅតុលាការខេត្តស្ទឹងត្រែង៕