រដ្ឋបាលខេត្តសៀមរាបបានកំណត់ទុករយៈពេល១០ថ្ងៃ សម្រាប់ការរុះរើសំណង់រំលោភលើដីផ្លូវ ដីចំណីផ្លូវ អូរ ប្រឡាយ និងដីចំណីផ្លូវស្ទឹងសៀមរាប ដើម្បីឲ្យការស្ថាបនាហេដ្ឋារចនាសម្ព័ន្ធផ្លូវទាំង ៣៨ខ្សែ អាចប្រព្រឹត្តទៅបានដោយរលូន និង សម្រេចតាមផែនការ។
រដ្ឋបាលខេត្តសៀមរាបបានបញ្ជាក់ថា បន្ទាប់ពីទទួលបានការអនុញ្ញាតពីសម្តេចតេជោនាយករដ្ឋមន្រ្តី សម្រាប់គម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែក្នុងក្រុងសៀមរាប ក្រុមការងារបច្ចេកទេសបានចុះសិក្សាខ្សែផ្លូវដែលត្រូវស្ថាបនា និងកែសម្រួល ហើយបានពិនិត្យឃើញថា មានសំណង់លំនៅដ្ឋាន តូបលក់ដូរ របង និងសំណង់ការ្យផ្សេងៗទៀតរបស់បងប្អូនប្រជាពលរដ្ឋមួយចំនួន បានសាងសង់រំលោភលើដីផ្លូវ ដីចំណីផ្លូវ អូរ ប្រឡាយ និងដីចំណីស្ទឹងសៀមរាប ដែលរដ្ឋបាលខេត្តបានកំណត់ និងចុះបញ្ជីដីធ្លីមានលក្ខណៈជាប្រព័ន្ធរួចហើយ ចាំបាច់ត្រូវធ្វើការរុះរើជាបន្ទាន់ សម្រួលដល់ការងារស្ថាបនាផ្លូវសម្របតាមផែនការដែលបានគ្រោងទុក។
ដូច្នេះ រដ្ឋបាលខេត្តសៀមរាបសម្រេចទុករយៈពេល ១០ថ្ងៃ គិតចាប់ពីថ្ងៃទី២៣ ខែកញ្ញា ឆ្នាំ២០២០ ដល់ថ្ងៃទី២ ខែតុលា ឆ្នាំ២០២០ ជាកំហិត ដល់បងប្អូនប្រជាពលរដ្ឋដែលមានសំណង់រំលោភលើដីផ្លូវ ដីចំណីផ្លូវ អូរ ប្រឡាយ និងដីចំណីស្ទឹងសៀមរាប ធ្វើការរុះរើដោយខ្លួនឯង។
ក្នុងករណីពុំបានរុះរើតាមការកំណត់ រដ្ឋបាលខេត្តនឹងចាត់វិធានការរុះរើតាមនីតិវិធី និងច្បាប់ជាធរមាន ដោយមិនទទួលខុសត្រូវរាល់ការខូចខាត និងបាត់បង់ទ្រព្យសម្បត្តិរបស់បងប្អូនប្រជាពលដ្ឋឡើយ៕
