លេខាធិការដ្ឋាន នៃគណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ (គ.ស.ព.ស.) នាថ្ងៃទី២៦ ខែធ្នូ ឆ្នាំ២០២៣ បានប្រកាសថា ព័ត៌មានដែលបង្ហោះដោយទំព័រហ្វេសប៊ុក The Cambodia Daily Khmer ដែលមានចំណងជើងថា «មន្ត្រីក្រសួងសេដ្ឋកិច្ចទម្លាយថា រដ្ឋាភិបាលខ្មែរខ្ចីលុយចិនប្រមាណ ៥ពាន់លានដុល្លារអាមេរិកដើម្បីសង់ព្រែកជីកហ្វូណននិងត្រៀមដោះស្រាយវិបត្តិសេដ្ឋកិច្ច» ជាព័ត៌មានក្លែងក្លាយ។
ទន្ទឹមនោះ លេខាធិការដ្ឋាន គ.ស.ព.ស. បានបញ្ជាក់ថា ក្រសួងសេដ្ឋកិច្ចនិងហិរញ្ញវត្ថុនឹងធ្វើការបកស្រាយបំភ្លឺអំពីករណីនេះ និងស្នើឱ្យសាធារណជណ កុំចែកចាយព័ត៌មានដែលបង្ហោះដោយទំព័រហ្វេសប៊ុក The Cambodia Daily Khmer នេះបន្ត។
ពាក់ព័ន្ធនឹងព័ត៌មានខាងលើនេះ រដ្ឋលេខាធិការទីស្តីការគណៈរដ្ឋមន្រ្តី និងជាប្រធានក្រុមការងារផេកសម្តេចធិបតី ហ៊ុន ម៉ាណែត លោក គួច វែងស្រ៊ុន បានលើកឡើងថា គម្រោងព្រែកជីកហ្វូណនតេជោ គឺជាគម្រោងដ៏ធំ និងប្រវត្តិសាស្ត្រសម្រាប់កម្ពុជា តភ្ជាប់ការដឹកជញ្ជូនពីទឹកសាបទៅកាន់សមុទ្រ ដែលនឹងបម្រើផលប្រយោជន៍យ៉ាងធំធេងសម្រាប់សេដ្ឋកិច្ចជាតិ និងប្រជាជន។
លោក គួច វែងស្រ៊ុន បានឱ្យដឹងទៀតថា គម្រោងនេះ គឺប្រភេទគម្រោងវិនិយោគផ្នែកឯកជន តាមរយៈ BOT គឺ B=Build កសាង O=Operation ប្រតិបត្តិការ និង T=Transfer ជាប្រភពទុន ១០០ភាគរយ របស់វិស័យឯកជន ដូចនេះរាជរដ្ឋាភិបាលកម្ពុជា មិនមានភាពចាំបាច់ណាមួយក្នុងការខ្ចីទឹកប្រាក់សម្រាប់ប្រើប្រាស់ក្នុងគម្រោងនេះទេ។
លោកថា៖ «សូមបងប្អូន អាចនឹងតាមដានបន្ត សម្រាប់ព័ត៌មានលម្អិត ដែលក្រសួងជំនាញ នឹងធ្វើការបកស្រាយលើករណីគម្រោងព្រែកជីកហ្វូណនតេជោ សម្រាប់អាចស្វែងយល់ការពិត ហើយជាពិសេសកុំចាញ់បោកនឹងព័ត៌មានបោកប្រាស់ បំភ្លៃការពិតរបស់ចរិតដើមនៃសារព័ត៌មានប្រឆាំងនេះ»៕