ក្រោយបើកដំណើរការជាផ្លូវការនៅថ្ងៃទី១៦ ខែតុលាមក ព្រលានយន្តហោះអន្ដរជាតិសៀមរាបអង្គរ នៅក្នុងស្រុកសូទ្រនិគម មានភាពអ៊ូអរខ្លាំង ក្នុងនោះពលរដ្ឋជិតឆ្ងាយបានធ្វើដំណើរទៅមើល ព្រលានយន្តហោះខ្នាតធំនេះ។
ចុងសប្ដាហ៍កន្លងទៅ រូបភាពច្រើនសន្លឹកបានបង្ហាញពីទិដ្ឋភាពពលរដ្ឋបានធ្វើដំណើរទៅកម្សាន្ត នៅព្រលានយន្តហោះថ្មី ដែលភាគច្រើនទៅជាលក្ខណៈគ្រួសារ។ ក្នុងនោះក៏មានការលក់ដូរតាមដងផ្លូវ ជិតព្រលានដែលកាន់កាប់ដោយក្រុមហ៊ុនចិនមួយនេះផងដែរ។
អភិបាលខេត្តសៀមរាបលោក ប្រាក់ សោភ័ណ ក៏បានចែករំលែករូបភាពពលរដ្ឋទៅមើល ព្រលានថ្មីនេះដែរ។ លោកបានសរសេរលើបណ្ដាញសង្គមផ្ទាល់ខ្លួនថា «កេរ្តិ៍មរតកសម្តេចតេជោយើងតើ ហេតុអ្វីពុកម៉ែបងប្អូនទៅមើលព្រលានប្រវត្តិសាស្ត្រល្អបែបនេះមិនបាន ពួកគាត់មិនបានទៅបង្កបញ្ហា រឺបង្កើតចលាចលទេ ជាសេចក្តីមោទកដែលពីមុន ជាទីព្រៃសំបូរទៅ ដោយមីន បានក្លាយជាទីកន្លែងដែលអភិវឌ្ឍន៍បែបនេះ»។
ជាមួយគ្នានោះដែរ លោកអភិបាលខេត្តបានបញ្ជាក់ថា គណៈគ្រប់គ្រងព្រលាន និងរដ្ឋបាលស្រុក បានរៀបចំ សណ្តាប់ធ្នាប់ ការលក់ដូរ បរិស្ថានអនាម័យបានល្អ មន្ទីរពាក់ពន្ធ័ក៏បានរៀបចំ ដើម្បីសម្រួលសេចក្តីសុខសុវត្ថិភាពក្នុងការធ្វើដំណើររបស់ភ្ញៀវជាតិ អន្តរជាតិ ជាពិសេសបងប្អូនដែលចង់ទៅស្គាល់ព្រលានយន្តហោះថ្មីខេត្តសៀមរាបនេះ៕
