កាលពីថ្ងៃទី២៦ ខែសីហា ឆ្នាំ២០២០ កម្លាំងជំនាញអធិការដ្ឋាននគរបាលស្រុកគិរីវង់ សហការជាមួយកម្លាំងប៉ុស្តិ៍នគរបាលរដ្ឋបាលព្រះបាទជាន់-ប៉ុស្តិ៍ព្រៃអំពក-ប៉ុស្តិ៍គិរីចុងកោះ-ប៉ុស្តិ៍កំណប់ -ប៉ុស្តិ៍ព្រៃរំដេង និងប៉ុស្តិ៍ភ្នំដិន បានចុះស្រាវជ្រាវរុករកឃើញទីតាំងដាំកញ្ឆាខុសច្បាប់ចំនួន១៣ទីតាំង ដែលបានលួចលាក់ដាំនៅចំណុច ដុបទឹកត្របែក និងដុបដាដំរី ស្ថិតក្នុងភូមិសាស្រ្តឃុំព្រះបាទជាន់ជុំ ស្រុកគិរីវង់ ខេត្តតាកែវ។
ក្រោយពីរកឃើញដំណាំកញ្ឆានៅលើផ្ទៃដី ជិត២ហិកតានោះ កម្លាំងចម្រុះក៏បានធ្វើការដុតបំផ្លាញចោល ហើយបច្ចុប្បន្នកំពុងតែស្រាវជ្រាវស្វែងរកអ្នកដាំមកផ្តន្ទាទោសតាមច្បាប់។
សូមបញ្ជាក់ថា កញ្ឆាត្រូវបានគេរកឃើញថាមានផ្ទុកសារធាតុពុល ឬ ម៉ូលេគុល សំខាន់មួយ ដែលជាភ្នាក់ងារទទួលខុសត្រូវបង្កឥទ្ធិពលលើប្រព័ន្ធសសៃរប្រសាទ ហើយត្រូវបានគេចាត់បញ្ចូល ទៅក្នុងបញ្ជីគ្រឿងញៀន។
យ៉ាងណាក៏ដោយដំណាំនេះ ត្រូវបានគេលួចលាក់ដាំ ហើយសម្រាប់នៅស្រុកគិរីវង់នេះ សមត្ថកិច្ចតែងតែចុះធ្វើការបង្រ្កាបជាញឹកញាប់ ប៉ុន្តែនៅតែមានអ្នកលួចលាក់ដាំបន្តទៀត៕
