ភ្នំពេញ៖ ច្រាំងទន្លេសាប និងទន្លេងមេគង្គ នៅក្នុងមូលដ្ឋាន ខណ្ឌជ្រោយចង្វារដែលដីតំបន់នោះកំពុងត្រូវប៉ាន់ឡើងកប់ពពកជាហេតុធ្វើឱ្យ ត្រូវបានក្រុមហ៊ុន និងអ្នកមានលុយ មានអំណាចមិនចេះឆ្អែតឆ្អន់ចង់បាននាំគ្នាបុកគ្រឹះ ធ្វើរបង រំលោភយកជាកម្មសិទ្ធិបណ្តើរហើយ ពុំត្រូវបានអាជ្ញាធរ ខណ្ឌជ្រោយចង្វា ក៏ដូចសាលារាជធានីភ្នំពេញ យកចិត្តទុកដាក់ទប់ស្កាត់នោះទេ ប៉ុន្តែត្រូវបានគេដាក់ការសង្ស័យថាជាការឃុបឃិតគ្នាទើបអាចធ្វើបាន ។
យោងតាមប្រភពពីប្រជាពលរដ្ឋដែលបណ្ដាញសារព័ត៌មាន ពេញចិត្តមេឌា ទើបទទួលបានឱ្យដឹងថា មានករណីអ្នកមានលុយមានអំណាច កំពុងប្រើគ្រឿងចក្រ ឈូសឆាយនិងចាក់ដីរំលោភច្រាំងទន្លេមេគង្គ ក្នុងភូមិរនះ សង្កាត់កោះដាច់ ខណ្ឌជ្រោយចង្វា ដែលអ្នកណាៗក៏មើលឃើញដែរ បើសិនគេធ្វើដំណើរតាមផ្លូវជាតិលេខ៦A ឆ្លងដ ព្រែកលាប កោះដាច់និងកោះកញ្ញាតី មកដល់កំពង់ដ កោះដាច់ និងឆ្លងស្ពានទៅកោះឧកញ៉ាតី ។ ក្រៅពីនោះ ក៏មានសំណង់របងជាច្រើនទៀតកំពុងតែសង់រំលោភយកច្រាំងទន្លេសាបហើយ សំណង់ទាំងនោះ បានសាងសង់រួចរាល់ហើយ និងខ្លះទៀតកំពុងតែសាងសង់។
តាមប្រភពទទួលព័ត៌មានបានលួចខ្សឹបទៀតថា គ្មានមន្ត្រីក្នុងខណ្ឌជ្រោយចង្វារណាម្នាក់ហ៊ានចេញមុខ ទប់ស្កាត់ ណែនាំចំពោះបុគ្គល មានលុយ មានអំណាច ដែលបានរំលោភយកដីច្រាំងទន្លេមេគង្គនេះទេ ។
សកម្មភាពឈ្លានពានច្រាំងទន្លេនេះត្រូវបានគេនិយាយថាដូចមិនស្តាប់ការសុំរបស់លោកលឹម គៀនហោ រដ្ឋមន្ត្រី ធនធានទឹក ដែលចេញលិខិតសុំឲ្យអាជ្ញាធរខេត្តរាជធានីជួយទប់ស្កាត់ចឹង!។
ចំពោះករណីនេះ បណ្ដាញសារព័ត៌មានពេញចិត្តមេឌា មិនអាចសុំការបកស្រាយ ពីលោកលឹម សុភា អភិបាលខណ្ឌជ្រោយចង្វារបាននៅឡើយទេ ដោយទំនាក់ទំនងតាមទូរសព្ទ លោកឆ្លើយថាកំពុងជាប់ប្រជុំ។
ពាក់ពន្ធ័នឹងបញ្ហានេះត្រូវបានមជ្ឈដ្ឋានមហាជនបាន សង្ស័យថាសុទ្ធតែជាការត្រូវរ៉ូវគ្នាទើបអាចធ្វើបាន បើមិនដូចច្នេះទេសូម្បីតែប្រជាពលរដ្ឋធ្វើរបងតូចតាចនៅលើដីស្របច្បាប់របស់ខ្លួនក៏មិនបានដែរ អាជ្ញាធរមកដល់ភ្លាម៕
បណ្ដាញសារព័ត៌មានពេញចិត្តមេឌា រង់ចាំការស្រាយបំភ្លឺ ពាក់ព័ន្ធនឹងករណីនេះ គ្រប់ភាគីដែលពាក់ព័ន្ធ តាមច្បាប់របបសារព័ត៌មាន។
ដោយ: សុិន ខ្វាន់ឆា
ទំនាក់ទំនងព័ត៌មាន:010840732/061881299
