យោងតាមលិខិតមួយច្បាប់របស់អង្គភាពប្រឆាំងអំពើពុករលួយបានឲ្យដឹងថា កាលពីចុងខែមករាកន្លងទៅ លោក អ៊ូច ភា អភិបាលខេត្តតាកែវ ត្រូវបានមន្រ្តីក្រោមបង្គាប់របស់ខ្លួនប្តឹងថាបានយកប្រាក់ដែលបានមកពីការផ្តល់សេវាច្រកចេញចូលតែមួយនៅរដ្ឋបាលខេត្ត ដោយមិនបានបែងចែកជាប្រាក់រង្វាន់ដល់មន្រ្តីរដ្ឋបាលក្នុង១ខែម្តងៗ តាមសេចក្តីសម្រេចរបស់ក្រសួងមហាផ្ទៃឡើយ។
ក្រុមមន្រ្តីទាំងនោះថា ការមិនបានបែងចែកភាគលាភនេះ បានធ្វើឲ្យប៉ះពាល់ដល់មន្រ្តីរដ្ឋបាលសាលាខេត្តទាំងមូល និងមន្រ្តីរដ្ឋបាលក្រុង ស្រុក ឃុំ សង្កាត់ ទូទាំងខេត្តតាកែវ ទៀតផង។
យ៉ាងណាក៏ដោយ ចំពោះការចោទប្រកាន់នេះ កាលពីថ្ងៃទី២៨ ខែកុម្ភៈ ឆ្នាំ២០២០ លោក អ៊ូច ភា អភិបាលខេត្តតាកែវ បានទៅធ្វើការបំភ្លឺនៅអង្គភាពប្រឆាំងអំពើពុករលួយ ដោយថា ការដែលមិនបែងចែកប្រាក់រង្វាន់តាមខែនីមួយៗ តាមគោលការណ៍ណែនាំរបស់ក្រសួងមហាផ្ទៃ គឺដោយសារប្រាក់រង្វាន់ដែលជាចំណែករបស់រដ្ឋបាលខេត្តផ្ទាល់ប្រចាំខែនីមួយៗមានចំនួនតិចតួច មន្ទីរវិស័យមួយចំនួនបានបើកផ្តល់ឲ្យសាលាខេត្តក្នុងមួយឆ្នាំម្តង ហើយដោយមានសំណូមពរពីមន្រ្តីភាគច្រើនសុំឲ្យធ្វើការបែងចែកប្រាក់រង្វាន់ជាប្រចាំឆ្នាំ ទើបរដ្ឋបាលខេត្តតាកែវ ធ្វើការរៀបចំបែងចែកប្រាក់រង្វាន់ជូនមន្រ្តីបុគ្គលិកម្នាក់ៗជាប្រចាំឆ្នាំវិញ៕
