ស្ថានីយ៍អង់តែនចំនួន១០០ នឹងត្រូវសង់បន្ថែម ដើម្បីពង្រឹងគុណភាពសេវាដល់គោលដៅទេសចរណ៍អាទិភាព និងតំបន់ទេសចរណ៍ដាច់ស្រយាល ក្នុងពេលឆាប់ៗនេះ ក្រោយពីមានការផ្តល់អនុសាសន៍របស់សម្តេចតេជោនាយករដ្ឋមន្រ្តី ក្នុងពិធីបិទសន្និបាតបូកសរុបការងារទេសចរណ៍កាលពីថ្ងៃទី១៤ ខែកក្កដា ឆ្នាំ២០២២។
បើតាមសេចក្តីប្រកាសព័ត៌មានរបស់ក្រសួងប្រៃសនីយ៍ និងទូរគមនាគមន៍ ស្ថានីយ៍អង់តែនដែលត្រូវសង់បន្ថែមនេះ នឹងប្រើប្រាស់ថវិការបស់មូលនិធិកាតព្វកិច្ចសេវាសកល ដោយមានកិច្ចសហការជាមួយក្រសួងទេសចរណ៍ ក្រសួងបរិស្ថាន ក្រសួងស្ថាប័នពាក់ព័ន្ធ និងប្រតិបត្តិករទូរស័ព្ទចល័តផងដែរ។
