លោក ចន្ថា វ៉ាន់ឌី អធិការរងខណ្ឌឫស្សីកែវ បានបាញ់សម្លាប់ខ្លួនឯងនៅលើផ្ទះ ដោយបានត្រឹមបន្សល់ទុកលិខិតចំនួន២សន្លឹកទុកមុនពេលស្លាប់។
ករណីនេះ បានកើតឡើងនៅរសៀលថ្ងៃទី៤ ខែកក្កដា ឆ្នាំ២០២២ ស្ថិតក្នុងភូមិក្បាលកោះ ឃុំកោះឧកញ៉ាតី ស្រុកខ្សាច់កណ្តាល។ សមត្ថកិច្ចបានឱ្យដឹងបឋម ថា មុនពេលកើតហេតុ អធិការរងរូបនេះបានធ្វើដំណើរទៅផ្ទះ រួចក៏ជិះម៉ូតូចេញទៅវិញ។ បន្តិចក្រោយមក លោកក៏មកប្រាប់ម្តាយថាខ្លួនភ្លេចកាបូប នៅក្នុងផ្ទះ។ ដល់ពេលឡើងទៅយកកាបូប ស្រាប់តែបាញ់សម្លាប់ខ្លួនឯង ដោយមិនដឹងមូលហេតុអីឱ្យពិតប្រាកដនៅឡើយទេ។
ក្រដាសបណ្តាំចុងក្រោយ ដែលលោក ចន្ថា វ៉ាន់ឌី បានបន្សល់ទុក បានសរសេរនូវពាក្យក្នុងចិត្តមួយចំនួន។ ក្នុងបណ្តាំចុងក្រោយបានសរសេរថា៖ «ប៉ាក្មេក និងម៉ាក់ក្មេកឱ្យកូនសុំទោសលោកទាំងពីរផង ដែលកូនបានយកលុយប៉ា និងម៉ាក់ថា មានគេខ្ចី..ហើយឱ្យការ តែការពិតគឺមិនមែនទេ គ្មានអ្នកណាខ្ចីលោកទាំងពីរទេ គឺកូនយកលុយនេះមកលេងល្បែងចាក់បាល់ទេ សូមឱ្យលោកទាំងពីរអហោសកម្មឱ្យកូនប្រសារគ្មានបានការម្នាក់នេះផង បើមានជាតិក្រោយមែនពិត កូននឹងសងគុណលោកទាំងពីរវិញ»៕
