បុរសចំនួន២នាក់ ត្រូវបានកម្លាំងប៉ុស្តិ៍នគរបាលរដ្ឋបាលចោមចៅទី១ ធ្វើការឃាត់ខ្លួន កាលពីរសៀល ថ្ងៃទី១២ ខែសីហា ឆ្នាំ២០២១ម្សិលមិញ នៅចំណុចក្លឹបហាត់ប្រាណ MS Gym ក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ បន្ទាប់ពីបុរសទាំង២នាក់នេះ បានអះអាងថា ខ្លួនជាក្រុមការងាររបស់អភិបាលក្រុងភ្នំពេញ ហើយបានធ្វើសកម្មភាពទារលុយពីក្លឹបហាត់ប្រាណ។
តាមសេចក្តីរាយការណ៍ថា បុរសពីរនាក់ខាងលើនេះ បានធ្វើដំណើរដោយជិះម៉ូតូ០១គ្រឿងម៉ាក់ PCX ពណ៌ស ស្លាកលេខតាកែវ 1Y-7820 ហើយដើរទារលុយ ពីក្លឹបហាត់ប្រាណចំនួន ២០ដុល្លារ ដោយថាក្លឹបហាត់នោះល្មើសបម្រាមគោចរ។
ក្រោយទទួលបានព័ត៌មាននេះ កម្លាំងនគរបាលប៉ុស្តិ៍ចោមចៅទី១ ក៏បានចុះទៅដល់កន្លែងកើតហេតុនោះភ្លាម និងធ្វើការសាកសួរ រួចក៏បាននាំខ្លួនបុរសទាំងពីរនាក់ មកកាន់ប៉ុស្ដិ៍ដើម្បីសារសួរបន្ត ៕
