បុរសចំនួន២នាក់ ដែលបានល្មើសទៅនឹងវិធានការបិទខ្ទប់មិនឲ្យមានការធ្វេីដំណេីរឆ្លងខេត្ត ត្រូវបានធ្វើការផាកពិន័យម្នាក់៣លានរៀល ព្រមទាំងបញ្ជូនទៅធ្វើចត្តាឡីស័កចំនួន ១៤ថ្ងៃថែមទៀត។
សូមបញ្ជាក់ថា ករណីល្មើសរបស់បុរសទាំង២នាក់នោះ បានកើតឡើងកាលពីវេលាម៉ោងប្រមាណជិត៩យប់ ថ្ងៃទី២៣ ខែមេសា ឆ្នាំ២០២១ នៅចំណុចភូមិដូនអោក ឃុំល្វា ស្រកបវេល ខេត្តបាត់ដំបង ដែលជាចំណុចគោលដៅរបស់សមត្ថកិច្ចរាំងខ្ទប់ការធ្វេីចរាចរណ៍ឆ្លងកាត់ខេត្ត បាត់ដំបងនិងខេត្តបន្ទាយមានជ័យ។ ពេលនោះក៏មានអ្នកបេីកបររថយន្តចំនួន០២គ្រឿង ដែលមានទិសដៅពីខេត្តបន្ទាយមានជ័យ ប៉ុនប៉ងជ្រៀតចូលមកក្នុងមូលដ្ឋានខេត្តបាត់ដំបង ដែលរថយន្តទាំងពីរគ្រឿង នេះ បានបេីកគេចពីចំណុចគោលដៅត្រួតពិនិត្យ របស់សមត្ថកិច្ចនៅលេីផ្លូវជាតិលេខ៥ រួចឆ្ពោះចូលតាមផ្លូវតូចៗសំដៅមកមូលដ្ឋានស្រុកបវេល តែក៏ត្រូវបានសមត្ថកិច្ចចាប់បាន។
អ្នកបេីកបររថយន្តទាំងពីរនាក់នោះ ត្រូវបានបញ្ជាក់ថា ១-ឈ្មោះ វិញ យូស៊ីន ភេទប្រុស អាយុ ៣៤ឆ្នាំរស់នៅឃុំវត្តតាមឹម ស្រុកសង្កែ ខេត្តបាត់ដំបង និង ២-ឈ្មោះ ដោក ដាំ ភេទប្រុស អាយុ៣៩ឆ្នាំរស់នៅភូមិសុភី១សង្កាត់រតនៈក្រុងបាត់ដំបង ខេត្តបាត់ដំបង៕
