តាមសេចក្តីជូនដំណឹងរបស់ក្រសួងធនធានទឹក និងឧតុនិយម នៅព្រឹកថ្ងៃទី១៦ ខែមីនា ឆ្នាំ២០២១នេះបានឲ្យដឹងថា ក្នុងមួយសប្តាហ៍នេះ ប្រទេសកម្ពុជានឹងទទួលរងឥទ្ធិពលជាបន្តបន្ទាប់ ដោយក្នុងនោះ ពីថ្ងៃទី១៧-១៩ នឹងទទួលរងឥទ្ធិពល ខ្យល់ស្ងប់វិលវិល និងបណ្តុំសម្ពាធទាបច្រើន, ពីថ្ងៃទី២០-២៣ ខែមីនា នៅភាគឦសានប្រទេស នឹងទទួលឥទ្ធិពលពីទ្រនុងសម្ពាធខ្ពស់ប៉ាស៊ីហ្វិក ហើយភាគនិរតី នឹងទទួលឥទ្ធិពលពីជ្រលងសម្ពាធទាបឥណ្ឌូនេស៊ី។
ស្ថានភាពបែបនេះ នឹងធ្វើឲ្យបណ្តាខេត្តនៅវាលទំនាបកណ្តាល មានសីតុណ្ហភាពពី ២៥ ទៅ៣៨អង្សាសេ ហើយអាចមានភ្លៀងផ្គរ រន្ទះ ពីខ្សោយទៅច្រើន។
បណ្តាខេត្តជាប់ជួរភ្នំដងរែក និងខ្ពង់រាបឦសាន សីតុណ្ហភាពអាចមានពី ២៥ ទៅ ៣៨អង្សាសេ និងមានភ្លៀងផ្គរ រន្ទះ ពីផ្សែងក្រូចទៅច្រើន។
ហើយសម្រាប់តំបន់មាត់សមុទ្រ សីតុណ្ហភាពមានពី ២៤ ទៅ ៣៥អង្សាសេ ព្រមទាំងអាចមានភ្លៀងផ្គរ រន្ទះ ពីខ្សោយទៅច្រើន។
ក្នុងនោះ ក្រសួងធនធានទឹក ស្នើឲ្យបងប្អូនប្រជាពលរដ្ឋ សូមយកចិត្តទុកដាក់ប្រុងប្រយ័ត្ននូវបាតុភូតខ្យល់កន្រ្តាក់ ដែលអាចកើតមាននៅថ្ងៃទី២១-២៣ ខែមីនា៕
