ក្រសួងធនធានទឹក និងឧតុនិយមបានប្រកាសនៅថ្ងៃទី២៤ ខែវិច្ឆិកា នេះថា រដូវវស្សាឆ្នាំ២០២០ សន្មត់ថាបានបញ្ចប់ជាស្ថាពរនៅថ្ងៃទី២២ ខែវិច្ឆិកា ឆ្នាំ២០២០ហើយ។ ទន្ទឹមនឹងការបិទបញ្ចប់រដូវវស្សានោះ ឥឡូវនេះ គេឃើញសម្ពាធខ្ពស់មួយបានកំពុងរំកិលចុះក្រោមគ្របដណ្តប់លើប្រទេសកម្ពុជា ជាមួយខ្យល់មូសុងឦសាន្តកម្រិតបង្គួរ ដែលនឹងធ្វើឲ្យតំបន់ខ្លះចុះត្រជាក់។
បើតាមការព្យាកររបស់ក្រសួងធនធានទឹក និងឧតុនិយម ជាមួយស្ថានភាពនេះ បណ្តាខេត្តនៅតំបន់វាលទំនាបកណ្តាល សីតុណ្ហភាពអាចមានចាប់ពី ២២ ទៅ៣២អង្សាសេ, បណ្តាខេត្តជាប់ជួរភ្នំដងរែក និងខ្ពង់រាបឦសាន អាចមានពី ១៩ ទៅ៣១អង្សាសេ។
ចំណែកតំបន់មាត់សមុទ្រ សីតុណ្ហភាពអាចមានពី ២៣ ទៅ ៣១អង្សាសេ៕
