ពលរដ្ឋជិត២០គ្រួសាររស់នៅភូមិពន់កក ឃុំបាស្រែ ស្រុកអង្គរបុរី ខេត្តតាកែវ បានដាក់ពាក្យបណ្ដឹងចូលទៅកាន់សាលាស្រុកអង្គរបូរី រឿងបុគ្គលម្នាក់បានសង់របងបិទផ្លូវដែលពួកគាត់ធ្លាប់ដើរជិត៤០ឆ្នាំ ប៉ុន្តែបណ្តឹងនោះបានដាក់រាប់ខែទៅហើយ គេមិនឃើញក្រុមអាជ្ញាធរមានចំណាត់ការយ៉ាងណានោះទេ។
បើតាមពលរដ្ឋថា ផ្លូវនៅចំនុចនោះ ពួកគាត់បានធ្វើដំណើរឆ្លងកាត់តាំងពីដូនតាមក និងជាផ្លូវដ៏មានសារៈសំខាន់សម្រាប់ដឹកកសិផល តែកាលពីពេលថ្មីៗនេះ ស្រាប់តែមានបុគ្គលម្នាក់បានទៅសង់របងបិទផ្លូវនោះ យកដីធ្វើជាកម្មសិទ្ធផ្ទាល់ខ្លួន។
ប្រជាពលរដ្ឋថា ដោយគ្មានផ្លូវធ្វើដំណើរ ពួកគាត់ក៏សម្រេចចិត្តដាក់ពាក្យប្ដឹងទៅអាជ្ញាធរស្រុក តែបែរជាអាជ្ញាធរធ្វើព្រងើយមិនមានចំណាត់ការអ្វីទាំងអស់។
ពាក់ពន្ធករណីនេះ លោក ឌឿ ជា អភិបាលរងស្រុកអង្គរបូរី បានថ្លែងថា ពាក្យបណ្ដឹងដែលពលរដ្ឋប្ដឹងទាមទារបើកផ្លូវនៅចំនុចភូមិពន់កកនោះ រដ្ឋបាលស្រុកបានទទួលហើយ តែរង់ចាំចំណារពីលោក ឌឹម គឹមសាន្ដ អភិបាលស្រុកសិនថា តើលោកឲ្យអ្នកណាជាអ្នកដោះស្រាយ។
ជាមួយគ្នានេះ លោក ឌឿ ជា ក៏ទទួលស្គាល់ដែរថា ផ្លូវនោះ គឺពលរដ្ឋធ្លាប់ដើរមែន តែមិនដឹងថា បុគ្គលដែលសង់របងបិទផ្លូវនេះគេមានសំអាងលើឯកសារអ្វីនោះទេ បានជាហ៊ានសង់របងបិទផ្លូវដើរបែបនេះ៕
