ក្រសួងធនធានទឹក និងឧតុនិយមបានឲ្យដឹងថា ព្យុះទី១៨ ដែលមានឈ្មោះថា ម៉ូឡាវ បានបង្កើនឥទ្ធិពលរបស់ខ្លួនក្នុងសមុទ្រចិនខាងត្បូងកាលពីថ្ងៃទី២៦ ខែតុលា ហើយព្យុះនេះនឹងធ្វើដំណើរឆ្ពោះទៅប្រទេសវៀតណាមត្រង់ចំណុចខេត្តក្វាងងៃ រួចទើបថមថយឥទ្ធិពលជាបន្តបន្ទាប់ពេលឆ្លងកាត់ប្រទេសវៀតណាម និងប្រទេសថៃ នៅថ្ងៃទី២៩ ខែតុលា ខណៈដែលវិសម្ពាធ និងសម្ពាធទាបម៉ូឡាវ នឹងមានឥទ្ធិពលមកលើប្រទេសកម្ពុជានៅថ្ងៃទី២៨-២៩ ខែតុលា។
តាមការព្យាកររបស់ក្រសួង ស្ថានភាពបែបនេះ នឹងធ្វើឲ្យបណ្តាខេត្តនៅតំបន់វាលទំនាបកណ្តាលមានសីតុណ្ហភាពពី ២១-២៤អង្សា ហើយបណ្តារាជធានី-ខេត្តមួយចំនួននៅភាគខាងក្រោម និងជាប់ព្រំដែនវៀតណាម ភ្លៀងនៅបន្តមានក្នុងកម្រិតពីតិចទៅមធ្យម រហូតដល់ថ្ងៃទី២ ខែវិច្ឆិកា, តែសម្រាប់ថ្ងៃទី២៨-២៩ ខែតុលា ពិសេសភាគពាយ័ព្យនឹងមានភ្លៀងធ្លាក់រាយប៉ាយក្នុងកម្រិតពីមធ្យមទៅច្រើន។
សម្រាប់បណ្តាខេត្តជាប់ជួរភ្នំដងរែក និងខ្ពង់រាបឦសាន សីតុណ្ហភាពនឹងមានពី ២០-២២អង្សា ហើយភ្លៀងនៅតែបន្តមានក្នុងកម្រិតពីតិចទៅបង្គួរ រហូតដល់ថ្ងៃតី២ ខែវិច្ឆិកា តែច្រើនលាយឡំនឹងខ្យល់ខ្លាំងនៅថ្ងៃទី២៨-២៩ ខែតុលា។
ដោយឡែកតំបន់មាត់សមុទ្រវិញ សីតុណ្ហភាពអាចមានពី ២២-២៤អង្សា ហើយនឹងអាចមានភ្លៀងធ្លាក់រាយប៉ាយនៅក្នុងកម្រិតបរិមាណពីតិច ទៅបង្គួរ។
ជាមួយគ្នានេះ ក្រសួងស្នើដល់បងប្អូនប្រជាពលរដ្ឋទាំងអស់សូមយកចិត្តទុកដាក់ប្រុងប្រយ័ត្ន ដើម្បីជៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ៕
