ស្ថានទូតកម្ពុជាប្រចាំទីក្រុងបាងកកបានឲ្យដឹងថា បន្ទាប់ពីមានប្រតិកម្មខ្លាំងតាមបណ្តាញសង្គមទាក់ទងកុនភាគថៃ មានចំណងជើងថា «សន្យាស្នេហ៍» ចាក់ផ្សាយនៅក្នុងទូរទស្សន៍ថៃប៉ុស្តិ៍លេខ៣ ដែលបានយករូបប្រាសាទអង្គរវត្តរបស់កម្ពុជាទៅដាក់ផ្ទៃខាងក្រោយ នៃផ្ទាំងឃោសនាផ្សាយពាណិជ្ជកម្ម ស្ថានទូតក៏បានទំនាក់ទំនងទៅស្ថានីយ៍ទូរទស្សន៍ប៉ុស្តិ៍លេខ៣ ដើម្បីសុំការបកស្រាយ ហើយជាការឆ្លើយតប ស្ថានីយ៍ទូរទស្សន៍ប៉ុស្តិ៍លេខ៣ថៃ ក៏បានផ្លាស់ប្តូរផ្ទាំងឃោសនាកុនភាគមួយនេះ ដោយបានដកចេញនូវរូបប្រាសាទអង្គរវត្ត ហើយបានសុំទោសប្រជាជនកម្ពុជា ចំពោះកំហុសឆ្គងដ៏រស៊ើបមួយនេះ។
ស្ថានីយ៍ទូរទស្សន៍ប៉ុស្តិ៍លេខ៣ថៃ បានលើកឡើងថា ខ្លួនគ្មានបំណងប្រើប្រាស់រូបភាពប្រាសាទអង្គរវត្តក្នុងន័យទុច្ចរិតណាមួយឡើយ ហើយថា ខ្លួននឹងប្រុងប្រយ័ត្នដើម្បីចៀសវាងផលប៉ះពាល់ដែលកើតឡើងនាពេលអនាគត ដែលនាំឲ្យខូចខាតទំនាក់ទំនងប្រទេសយើងទាំងពីរ៕
