ខេត្តបាត់ដំបង៖ មន្ត្រីនគរបាលខេត្តបាត់ដំបងបានឲ្យដឹងថា នៅថ្ងៃទី ០៥ ខែ មិថុនា ឆ្នាំ ២០២៤ វេលាម៉ោង ១១និង០៥ នាទី នៅចំណុចភូមិព្រៃដាច់ ឃុំអូរតាគី ស្រុកថ្មគោល ខេត្តបាត់ដំបង កម្លាំងក្រុមអន្តរាគមន៍បង្ការ បង្ក្រាប នៃស្នងការដ្ឋាននគរបាលខេត្តបាត់ដំបង សហការជាមួយកម្លាំងអធិការដ្ឋាននគរបាលស្រុកថ្មគោល ចុះប្រតិបត្តិការ បង្ក្រាបករណី លួចមានស្ថានទម្ងន់ទោស (គាស់បង្អួចផ្ទះ )១ ករណី ដោយបាននាំខ្លួនជនសង្ស័យឈ្មោះ ស៊ឹម ពេជ្រ ភេទ ប្រុស អាយុ ៣២ ឆ្នាំ មានទីលំនៅភូមិចំការសំរោង២ សង្កាត់ចំការសំរោង ក្រុងបាត់ដំបង ខេត្តបាត់ដំបង មកកាន់ស្នងការដ្ឋាន ។
មន្ត្រីនគរបាលខេត្តបាត់ដំបងបានរំលឹកថា កាលពីថ្ងៃទី ៣១ ខែ ឧសភា ឆ្នាំ ២០២៤ នៅចន្លោះវេលាម៉ោង ០៣ និង៥០ ទៅ ០៤និង៣០ នាទី នៅចំណុចភូមិចុងព្រែក សង្កាត់ក្តុលដូនទាវ ក្រុងបាត់ដំបង ខេត្តបាត់ដំបង ជន សង្ស័យខាងលើរួមជាមួយបក្សពួកម្នាក់ទៀត បានចូលទៅគាស់បង្អួចផ្ទះរបស់ជនរងគ្រោះ ឈ្មោះ អ៉ី ណា ភេទ ប្រុស អាយុ ៤៧ ឆ្នាំ មានទីលំនៅនៅខេត្តប៉ៃលិន ហើយ លួចយកកាបូប និងទូរស័ព្ទដៃ របស់ជនរងគ្រោះ ហើយ ក៏ជិះគេចខ្លួនបាត់ រហូតដល់ថ្ងៃខែខាងលើ ទើបកម្លាំងយើងធ្វើការស្រាវជ្រាវរហូតចាប់ខ្លួនបាន ។
បច្ចុប្បន្នការិយាល័យជំនាញនៃស្នងការនគរបាលខេត្តបាត់ដំបងកសាងសំណុំរឿងដើម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី៕
