កាលពីថ្មីៗនេះមានការផ្សព្វផ្សាយលើបណ្តាញសង្គមអំពីករណីគ្រឿងចក្រកិនបុរសម្នាក់ស្លាប់នៅក្នុងភូមិជីមាល ឃុំអណ្តូងទឹក ស្រុកបូទុមសាគរ ខេត្តកោះកុង ដោយថា ម្ចាស់គ្រឿងចក្រមិនទទួលខុសត្រូវ ហើយខ្លះទៀតថាកើតឡើងដោយសារជម្លោះកើតឡើងរវាងអាជ្ញាធរ និងម្ចាស់ដី។
ពាក់ព័ន្ធនឹងករណីនេះ ខាងគ្រួសារជនរងគ្រោះ គឺកូនស្រីបានបកស្រាយថា ឪពុកខ្លួនកាលពីថ្ងៃទី២១ ខែកុម្ភៈ ឆ្នាំ២០២៤ បានជួលគ្រឿងអស្កាវ៉ាទ័រមួយគ្រឿងដើម្បីកាយស្រះយកទឹកសម្រាប់ស្រោចដំណាំក្នុងចម្ការទុរេន និងផ្លែសាវម៉ាវ របស់គាត់ តែអកុសលត្រូវបានគ្រឿងអស្កាវ៉ាទ័រកិនស្លាប់ ខណៈខាងអ្នកបើកបរគ្រឿងអស្កាវ៉ាទ័របានរត់គេចខ្លួនបាត់ក្រោយហេតុការណ៍កើតឡើង។
កូនស្រីបុរសជនរងគ្រោះបានអះអាងទៀតថា ការប្រើប្រាស់គ្រឿងចក្រសម្រាប់ស្តារស្រះយកទឹកសម្រាប់ស្រោចដំណាំនេះ គឺធ្វើនៅក្នុងចម្ការដែលជាដីកម្មសិទ្ធិស្របច្បាប់របស់ឪពុកដែលអាស្រ័យផលអស់រយៈពេល១០ឆ្នាំមកហើយ។
ជុំវិញការផ្សព្វផ្សាយលើបណ្តាញសង្គមហ្វេសប៊ុកនានា កូនស្រីបុរសជនរងគ្រោះបដិសេដថា មូលហេតុនៅពីក្រោយការស្លាប់របស់ឪពុកមិនមែនកើតឡើងដោយសារតែជម្លោះយកដីធ្លីរដ្ឋជាមួយនឹងអាជ្ញាធរនោះទេ។ ចំណែកករណីម្ចាស់គ្រឿងចក្រក៏បានចូលខ្លួនមករំលែកទុក្ខជាមួយគ្រួសារនៃសព និងទទួលដោះស្រាយជាមួយគ្រួសារនៃសពផងដែរ។
ករណីនេះផងដែរ រដ្ឋបាលស្រុកបូទុមសាគរ បានអះអាងថា កាលពីថ្ងៃទី២៧ ខែកុម្ភៈ ឆ្នាំ២០២៤ អាជ្ញាធរបានចុះទៅត្រួតពិនិត្យ និងបញ្ឈប់សកម្មភាពការឈូសឆាយសម្អាតដី ជីកស្រះដោយគ្មានច្បាប់អនុញ្ញាត១កន្លែង ប៉ុន្តែមិនមែននៅទីតាំងកើតឡើងនោះទេ ពោលស្ថិតក្នុងភូមិព្រលាន ឃុំកណ្តោល ស្រុកបូទុមសាគរ ខេត្តកោះកុង ដោយករណីខាងលើនេះជាករណី២ផ្សេងគ្នា៕