ជាថ្មីម្តងទៀត នៅព្រឹកថ្ងៃទី២៣ ខែកញ្ញា ឆ្នាំ២០២០នេះ ក្រសួងធនធានទឹក និងឧតុនិយម បានប្រកាសប្រាប់ទៅដល់បងប្អូនប្រជាពលរដ្ឋដែលរស់នៅទីទំនាប ក្បែរតំបន់ភ្នំ និងជាប់ផ្លូវទឹក ត្រូវបង្កើនការប្រុងប្រយ័ត្នខ្ពស់ ចំពោះជំនន់ទឹកភ្លៀង ហើយអ្នកនេសាទ និងអ្នកដំណើរសមុទ្រ ក៏ត្រូវប្រុងប្រយ័ត្នចំពោះខ្យល់ខ្លាំង និងរលកសមុទ្រខ្ពស់ផងដែរ។
ទាំងនេះ ក៏ព្រោះតែក្រសួងសង្កេតឃើញថា ប្រព័ន្ធសម្ពាធទាប បានរំកិលអូសបន្លាយឆ្លងកាត់លើភាគខាងជើងប្រទេសកម្ពុជា ដែលស្ថានភាពនេះ នឹងធ្វើឲ្យភ្លៀងបង្កើនការធ្លាក់រាយប៉ាយលើផ្ទៃប្រទេសក្នុងកម្រិតបរិមាណពីបង្គួរ ទៅច្រើន, ក្នុងនោះបណ្តាខេត្តមួយចំនួននៅភាគខាងក្រោម ភាគខាងកើតជាប់ប្រទេសវៀតណាម និងខេត្តនៅតំបន់មាត់សមុទ្រ អាចមានភ្លៀងធ្លាក់ច្រើន៕
