កម្មវិធីបុណ្យអុំទូក បណ្តែតប្រទីប ដែលប្រារព្ធធ្វើនៅដងស្ទឹងសង្កែ ខេត្តបាត់ដំបង បានបញ្ចប់ហើយកាលពីល្ងាចថ្ងៃទី២៩ តុលា ម្សិលមិញ ក្រោយប្រារព្ធធ្វើឡើងអស់រយៈពេល២ថ្ងៃ។ ជាការកត់សម្គាល់គេឃើញថា នៅក្នុងឆ្នាំ២០២៣នេះ ចំនួនទូកដែលបានចូលរួមមានចំនួនច្រើនជាងឆ្នាំកន្លងទៅ។
បើយោងតាមគណៈកម្មការ នៅឆ្នាំនេះ ទូកដែលបានមកចូលរួមប្រណាំង មានសរុបទូកងចំនួន៤៥ទូក ក្នុងនោះមាន ប្រភេទទូកផ្កាចារ, ទូកងខ្នាតអន្តរជាតិនារី, ទូកងខ្នាតអន្តរជាតិបុរស, ទូកខ្លីប្រពៃណី, ទូកវែងផែនពិសេស រួមទាំងគូប្រណាំងលក្ខណៈមិត្តភាពមកពីខេត្តពោធិ៍សាត់ និងខេត្តបន្ទាយមានជ័យផងដែរ។
លោក សុខ លូ អភិបាលខេត្តបាត់ដំបងបានលើកឡើងថា ការរៀបចំពិធីបុណ្យអុំទូកនេះឡើង ដើម្បីផ្តល់ឱកាសដល់ប្រជាពលរដ្ឋទាំងអស់បានសប្បាយរីករាយ ។ ម៉្យាងទៀតដើម្បីបង្ហាញដល់យុវជនអ្នកបន្តវេនបានយល់ដឹង ស្គាល់ពីអត្ថន័យពិធីបុណ្យនេះ។
លោកអភិបាលខេត្តបន្តថា ការចូលទស្សនាយ៉ាងច្រើន និងស្នាមញញឹមរបស់បងប្អូនប្រជាពលរដ្ឋទាំងពេលយប់ និងពេលថ្ងៃនេះបានឆ្លុះបញ្ចាំងពីការរីកចម្រើននៅក្នុងមូលដ្ឋាន ក៏ដូចជាទូទាំងប្រទេសក្រោមម្លប់សន្តិភាព។ មានសន្តិភាពមានសេចក្តីសុខ មានការអភិវឌ្ឍរីកចម្រើន ។ដូចនេះប្រជាពលរដ្ឋគ្រប់ៗគ្នាត្រូវប្តេជ្ញាចិត្តរួមគ្នាថែរក្សាការពារនូវសន្តិភាពឱ្យគង់វង្ស៕
