កិច្ចប្រជុំដំបូងរបស់គណៈរដ្ឋមន្ត្រីដំបូងឯកឧត្តម ហ៊ុន ម៉ាណែត នឹងត្រូវធ្វើឡើងនៅថ្ងៃទី២៤ សីហា ដោយអនុញ្ញាតឱ្យមានការផ្សាយផ្ទាល់ផងដែរ ដើម្បីផ្សព្វផ្សាយពីគោលនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា។
លោក នេត្រ ភក្ត្រា រដ្ឋមន្រ្តីក្រសួងព័ត៌មាន បានឱ្យដឹងតាមរយៈសេចក្តីជូនដំណឹងថា គណៈរដ្ឋមន្ត្រីអាណត្តិទី៧ នឹងរៀបចំកិច្ចប្រជុំពេញអង្គដំបូងរបស់ខ្លួននៅព្រឹកថ្ងៃទី២៤ ខែសីហា ឆ្នាំ២០២៣ វេលាម៉ោង ៧និង៣០នាទីព្រឹកនៅវិមានសន្ដិភាពរាជធានីភ្នំពេញ។ កិច្ចប្រជុំដំបូងនេះនឹងដឹកនាំដោយនាយករដ្ឋមន្ត្រី ហ៊ុន ម៉ាណែត ដោយផ្ទាល់។
ក្នុងសេចក្ដីជូនដំណឹងនោះបានលើកឡើងថា៖ «ក្រសួងព័ត៌មាន សូមស្នើដល់ប្រព័ន្ធផ្សព្វផ្សាយជាតិ និងអន្តរជាតិទាំងអស់ចូលរួមផ្សាយបន្តផ្ទាល់ពីវិទ្យុ និងទូរទស្សន៍ជាតិកម្ពុជាស្ដីពីកិច្ចប្រជុំពេញអង្គគណៈរដ្ឋមន្ត្រីដំបូងរបស់រាជរដ្ឋាភិបាលនីតិកាលទី៧ នៃរដ្ឋសភានេះឱ្យបានទូលំទូលាយដល់សាធារណជន»៕
