សត្វផ្សោតផ្កាឈូកដែលជាសត្វកម្រជិតផុតពូជ កាលពីថ្មីៗនេះត្រូវបានប្រទះក្នុងដៃសមុទ្រទឹកប្រៃខេត្តកំពត។ នាយខណ្ឌរដ្ឋបាលជលផលខេត្តកំពត លោក ស សូរិន្ទ បានបញ្ជាក់ថា សត្វផ្សោតទឹកប្រៃ ឬត្រី Dolphin មានរូបរាងពណ៌ផ្កាឈូកប្រភេទនេះ មានវត្តមាននៅក្នុងកម្ពុជាជាយូរមកហើយ។
លោកនាយខណ្ឌរដ្ឋបាលជលផលខេត្តកំពត បានប្រាប់ឱ្យដឹងថា សត្វផ្សោតផ្កាឈូកនេះ មានវត្តមាននៅក្នុងដែនសហគមន៍ព្រែកត្នោត និងសហគមន៍ចង្ហោន ក្នុងក្រុងបូកគោ ខេត្តកំពត។ លោកបន្តថា សត្វប្រភេទនេះវា លេចឡើងឱ្យមនុស្សឧស្សាហ៍ឃើញ ជាពិសេសប្រជានេសាទតែងតែប្រទះឃើញវាហែលប្រឡែងគ្នាលេង និងរកចំណី។
បើតាមលោក ស សូរិន្ទ សត្វផ្សោតផ្កាឈូកនេះរស់នៅក្នុងខេត្តកំពតមានប្រមាណពី១៥ ទៅ២០ក្បាលប៉ុណ្ណោះ ហើយវាមានអាយុកាលជាង ២០ឆ្នាំហើយ។
លោកបន្ថែមថា អាជ្ញាធរខេត្តកំពតកំពុងតែសហការជាមួយអង្គការអភិរក្សសមុទ្រកម្ពុជា (MCC) ក្នុងការអភិវឌ្ឍដែនសហគមន៍ទេសចរណ៍ធម្មជាតិព្រែកឆ្នោត ឬហៅថាអន្លង់ធំ និងដែនសហគមន៍ទេសចរណ៍ដង្ហោន ដើម្បីរៀបចំឱ្យភ្ញៀវទេសចរចូលមកកម្សាន្ត និងទស្សនាសត្វផ្សោតទឹកប្រៃប្រភេទនេះ។
លោកបានលើកឡើងថា ខេត្តកំពត នឹងអាចទាក់ទាញភ្ញៀវទេសចរបន្ថែមទៀតតាមរយៈការចូលទស្សនាសត្វផ្សោតផ្កាឈូកនេះ។
គួរបញ្ជាក់ថាផ្សោតផ្កាឈូកនេះត្រូវបានចុះបញ្ជីក្រហម IUCN ជាសត្វដ៏កម្រជិតផុតពូជ និងជាសត្វដែលងាយរងគ្រោះ។ សត្វផ្សោតដ៏ចម្លែកនេះវាមានវត្តមាននៅទូទាំងអាស៊ីអាគ្នេយ៍ រួមទាំងនៅឆ្នេរសមុទ្រអាហ្វ្រិកខាងត្បូង ប្រទេសចិន និងហុងកុង៕